جیمس جێفری: واشنتن و ئەنقەرە دوو ھاوبەشی زۆر نزیكن لە سووریا

"ئەو پەیوەندییانە بەردەوام دەبن، بەڵام بە ئاستێكی كەمتر لەوەی لە ماوەكانی پێشوودا بینیومانە"
جیمس جێفری، نێردەی تایبەتی پێشووی ئەمەریكا بۆ كاروباری سووریا
جیمس جێفری، نێردەی تایبەتی پێشووی ئەمەریكا بۆ كاروباری سووریا

K24 – ھەولێر:

نێردەی تایبەتی پێشووی ئەمەریكا بۆ كاروباری سووریا، جیمس جێفری، رایگەیاند، توركیا و ویلایەتە یەكگرتووەكان دوو ھاوبەشی زۆر لە یەكتر نزیكن لە سووریا و دەتوان بەیەكەوە لەو وڵاتەدا كاربكەن.

جێفری لە چاوپێكەوتنێكدا لەگەڵ ئاژانسی "ئەنادۆڵ"ی توركیایی جەختیكردەوە، كەوا خۆیی واقعبینانەیە لە پرسێكی زۆر ئەستەمی وەك پرسی سووریا و پێویستە راستییە نوێیەكان زۆر باش بخوێنرێنەوە و ھەڵوێست لەسەر ئەوە وەربگیرێت، لە حاڵەتێكدا ئەگەر چارەسەرییەكی تەواو نەدۆزرایەوە".

لە ھەڵسەنگاندنیدا بۆ ڕێرەوی مەزندەكراوی پەیوەندییەكانی نێوان سەرۆكی توركیا، رەجەب تەیب ئەردۆغان و ھاوتا ئەمەریكاییەكەی، جۆ بایدن، ئەو دیپلۆماتكارە ئەمەریكاییە گوتی: لەم كاتەدا كارە بەراییەكانی بایدن لەناوبردنی پەتای كۆرۆنا، ھاوسەنگییە سیاسییە ناوخۆییەكان، ململانێ لەگەڵ چین و گۆڕانی ئاووھەوایە.

جێفری گوتی: ویلایەتە یەكگرتووەكان لەم قۆناغە نوێیەدا نایەوێت پارە و سەرچاوەی سەربازی زۆر بۆ رۆژھەڵاتی ناوەڕاست تەرخان بكات، بۆیە لەگەڵ ھاوبەشە ناوچەییەكانی كاردەكات. ئاماژەشیكرد، "واشنتن بەھەماھەنگی لەگەڵ توركیا كاردەكات لە دوو دوسیەی گرنگ لە ناوچەكەدا، كە ئەوانیش ئیدلبی سووریا و تەرابلوسە له‌ لیبیا.

جێفری رایگەیاند، كەوا خۆی بۆ ئیدارەی بایدن پێشنیازی كردبوو بەردەوام بێت لە سەر سیاسەتەكانی "واقیعبینانە" و "كیسەنجەریانە" وەك ئەوانەی ویلایەتە یەكگرتووەكان پەیڕەوی كردن لە سەردەمی سەرۆكی پێشوو، دۆناڵد ترەمپ.

جێفری روونیكردەوە، پەیوەندییەكانی توركیا و ئەمەریكا ئێستا بە قۆناغێكی ھێوردا تێپەڕ دەبن و ئەو لە بڕوای تەواو دایە، كەوا لە ماوەی داھاتوودا باش دەبن.

گوتیشی: تێڕاوانینی نێوان ھەردوو وڵات و پەیوەندییەكانییان لە یەكتر نزیك نین، بەڵام ئێستا ھێوری بەخۆیەوە دەبینێت و لە شەش مانگی داھاتوودا بەرەو باشی دەڕوات.

جێفری ئاماژەیكرد، ویلایەتە یەكگرتووەكان و توركیا مێژوویەكیان لە ھاوپەیمانی له‌ چوارچێوه‌ی پەیمانی باكووری ئەتڵەسی (ناتۆ)دا ھەیە، كە زیاتر لە 70 ساڵە.

روونیشیكردەوە، ئەو دوو وڵاتە ھاوپەیمانە، رووبەڕووی قۆناغی قورس و ئەو پرسانە بوونەوە كە كاریگەری نەرێنیان كردە سەر پەیوەندییەكانیان، جەختیشكردەوە لەوەی پێویستە، متمانە لەنێوان ھەردوو حكومەتدا زیاد بكرێت و گوتی: "پەیوەندی زۆر بە لق و پۆپ لە نێوان توركیا و ویلایەتە یەكگرتووەكاندا ھەیە، ئەو پەیوەندیانە بەردەوام دەبن. ھێشتا سەرۆكی ئەمەریكا، جۆ بایدن و سەرۆكی توركیا رەجەب تەیب ئەردۆغان بە یەكەوە كۆ نەبوونەتەوە، بەڵام ھەرووكیان باش یەكتر دەناسن".

بەردەوام بوو و گوتی: "ئێستا پەراوێزێكی گەورە بۆ ھەڵە نییە. ئەو پەیوەندییانە بەردەوام دەبن، بەڵام بە ئاستێكی كەمتر لەوەی لە ماوەكانی پێشوودا بینیومانە".

سەرچاوە: "ئەنادۆڵ"