ئه‌مه‌ریكا كه‌شتیی جه‌نگی ره‌وانه‌ی ده‌ریای ره‌ش ده‌كات

به‌رپرسێكی سه‌ربازی ئه‌مه‌ریكا به‌ كه‌ناڵی "سی ئێن ئێن"ی راگه‌یاند، ئه‌مه‌ریكا ده‌یه‌وێت كه‌شتییه‌كی جه‌نگی ره‌وانه‌ی ده‌ریای ره‌ش بكات بۆ ئه‌وه‌ی په‌یامێك بگه‌یه‌نێته‌ رووسیا.
كه‌شتی جه‌نگی ئه‌مه‌ریكا
كه‌شتی جه‌نگی ئه‌مه‌ریكا

K24 – هه‌ولێر:

به‌رپرسێكی سه‌ربازی ئه‌مه‌ریكا به‌ كه‌ناڵی "سی ئێن ئێن"ی راگه‌یاند، ئه‌مه‌ریكا ده‌یه‌وێت كه‌شتییه‌كی جه‌نگی ره‌وانه‌ی ده‌ریای ره‌ش بكات بۆ ئه‌وه‌ی په‌یامێك بگه‌یه‌نێته‌ رووسیا.

ئه‌و به‌رپرسه‌ ناوی بڵاونه‌كراوه‌ته‌وه‌ و به‌ كه‌ناڵه‌كه‌ی گوتووه‌: هێزی ده‌ریایی ئه‌مه‌ریكا ئێستا وه‌ك بابه‌تێكی رۆتینی له‌ ده‌ریای ره‌شدا كار ده‌كه‌ن، به‌ڵام به‌ ناردنی ئه‌و كه‌شتییه‌ جه‌نگییه‌ ئه‌مه‌ریكا ده‌یه‌وێت په‌یامێك بداته‌ مۆسكۆ و پێی بڵێت ئێمه‌ به‌ وردی و له‌ نزیكه‌وه‌ چاودێری ره‌وشی ناوچه‌ سنوورییه‌كانی ئۆكرانیا و مه‌ترسییه‌كانی رووسیا له‌سه‌ر كییڤ ده‌كه‌ین.

روونیشیكردووه‌ته‌وه‌، فڕۆكه‌كانی چاودێری سوپای ئه‌مه‌ریكا به‌رده‌وام له‌ ئاسمانی ناوچه‌كه‌ ده‌سووڕێنه‌وه‌ بۆ چاودێریكردنی جمووجووڵی هێزه‌كانی رووسیا له‌ به‌رامبه‌ر ئۆكرانیا.

ئه‌و به‌رپرسه‌ ئه‌مه‌ریكایه‌ دووپاتیكردووه‌ته‌وه‌، هێزه‌كانیان له‌ ئاماده‌باشیدان و وه‌ڵامی هه‌ر جووڵه‌ و هێرشێكی رووسیا بۆ سه‌ر ئۆكرانیا ده‌ده‌نه‌وه‌.

رووسیا هێزێكی زۆری سه‌ربازی له‌ نزیك ناوچه‌ سنوورییه‌كانی ئۆكرانیا مۆڵ داوه‌.

ئه‌مه‌ریكا و وڵاته‌ خۆرئاواییه‌كان نیگه‌رانن له‌و جوڵه‌یه‌ی رووسیا و به‌ مه‌ترسی بۆ سه‌ر ئۆكرانیا له‌قه‌ڵه‌می ده‌ده‌ن.

مۆسكۆ رایگه‌یاندووه‌، ئاڵوگۆڕی هێز له‌ ناو خاكی رووسیا هیچ مه‌ترسییه‌ك بۆ سه‌ر دراوسێكان درووست ناكات و بابه‌تێكی ناوخۆییه‌.