یەدەكی عێراق لە پارەی بیانی زیادیكرد و گەیشتە 60 ملیار دۆلار
K24 – ھەولێر:
سەرۆكی حكومەتی عێراق، مستەفا كازمی، ئەمڕۆ یەكشەممە رایگەیاند، یەدەكی بانكی ناوەندی عێراق لە پارەی بیانی گەیشتە زیاتر لە 60 ملیار دۆلاری ئەمەریكایی.
لە راگەیاندراوێكی حكومەتدا لە دەمی كازمی گواستووەتەوە، گوتوویەتی: "یەدەكی بانكی ناوەندی عێراق لە پارەی بیانی زیادیكردووە و گەیشتووەتە زیاتر لە 60 ملیار دۆلار دوای ئەوەی 51.9 ملیار دۆلار بوو پێش دەستپێكردنی رێكارەكانی چاكسازی حكومەتەكەی".
گوتیشی: "ئەو زیادەیە لە ئەنجامی ئەو رێكارە چاكسازییانە ھات، كە حكومەت گرتیەبەر دوای ئەوەی زۆر كەس گرەوی لەسەر سەرنەكەوتنی و بەردەوام نەبوونی دەكرد، ھەروەھا توانیمان بەفیڕۆدان و ئەو گەندەڵییە زۆرەی لە مەزادی بانكی ناوەندی ھەبوو، راگرین و بەردەوامیش دەبین لە گرتنەبەری رێكارەكان و ھەرگیز ناوەستین".
كازمی ئاماژەیكرد، "رێكارەكانی حكومەتەكەی لە رووبەڕووبوونەوەی گەندەڵی بەردەوامە؛ ھەرچەندە كەسانێك ھەن تەگەرە دەخەنە بەردەمیان، بەڵام ئەوان بەردەوام دەبن و پاشگەز نابنەوە".
عێراق بە تەنگژەیەكی ئابووریدا تێپهڕ دەبێت و حكومەتی كازمیی ناچاركرد بەھای دینار كەم بكاتەوە بۆ ئەوەی بتوانێت مووچەیی فەرمانبەران و خانەنشینان بدات، كە ژمارەیان نزیكەی 6 ملیۆن فەرمانبەر و خانەنشینە".