ھۆشدارییەک لە تەندروستی گەرمیانەوە

K24- هەولێر:

بەڕێوەبەرایەتی تەندروستی گەرمیان بڵاویکردەوە، ئامارەکانی کۆرۆنا بە رادەیەکی مەترسیدار بەرزبونەتەوە، بەشێوەیەک رێژەی تووشبوون گەیشتووەتە 12٪.

روونیکردووەتەوە: ''واتا لە ھەر 100 کەسێک کە پشکنینیان بۆ دەکرێت، 12 کەسیان تووشبووی نەخۆشیەکەن. ھاوکات رێژەی گیان لەدەستدانیش بە نەخۆشییەکە زۆر زیادیکردووە و تەنھا لە دوێنێ و ئەمڕۆدا (5) ھاووڵاتی بە نەخۆشیەکە گیانیان لەدەستداوە''.

تەندروستی گەرمیان داو دەکات: ''ئەم ئامارانە بە ھەند وەربگرن، خۆتان بپارێزن و رێکارەکانی خۆپارێزیی بە تەواوی جێبەجێ بکەن''.

دەقی ئاگاداریینامەکەی تەندروستی گەرمیان:

ئامارەکانی کۆرۆنا بە رادەیەکی مەترسیدار بەرزبونەتەوە، بەشێوەیەک رێژەی توشبون گەشتوەتە ١٢٪‏، واتا لە ھەر سەد کەسێک کە پشکنینیان بۆ دەکرێت ١٢ کەسیان توشبوی نەخۆشیەکەن. ھاوکات رێژەی گیان لەدەستدانیش بە نەخۆشییەکە زۆر زیادیکردوە و تەنھا لە دوێنێ و ئەمڕۆدا (٥) ھاوڵاتی بە نەخۆشیەکە گیانیان لەدەستداوە لە سنورەکەمان دا.

بۆیە داواکارین ھاوڵاتیان ئەم ئامارانە بە ھەند وەربگرن، خۆیان بپارێزن و رێکارەکانی خۆپارێزیی بە تەواوی جێبەجێ بکەن، بەشێوەیەک دوور بن لە قەرەباڵەغی و تێکەڵیی زۆر، ھەروەھا ماسک بەکاربێنن و دەستیان بە بەردەوام بشۆن.

ئەم رێکارانە لەگەڵ ھاتنی مانگی رەمەزانی پیرۆز دەبێت زیاتر و توندوتۆڵتر بکرێت لەلایەن ھاوڵاتیانەوە بۆ ئەوەی مانگەکەمان بە سەلامەتی و ئاسوودەیی تێپەڕێت.

ب. گ. تەندروستی گەرمیان

١٢/٤/٢٠٢١