نێچيرڤان بارزانى سه‌رساڵا ئێزدييان پيرۆز دكه‌ت
K24- هه‌ولێر:
ب هه‌لكه‌فتنا هاتنا جه‌ژنا سه‌رساڵا نو یا ئۆلا ئێزیدییان، نێچیرڤان بارزانی، سه‌رۆكێ هه‌رێما كوردستان په‌یامه‌كه پیرۆزباهیێ راستی ته‌ڤایا ئێزیدیێن هه‌رێما كوردستانێ و جیهانێ كر و ته‌كه‌ز كر، ئه‌م هه‌موو ئێزدييان پشتڕاست دكه‌ين، هه‌تا دووماهيێ و هندى ئێزدييه‌ك ره‌ڤاندى مابيت، ئه‌م دێ ل په‌ى چاره‌نڤيسێ وان بين و چ پێويسته ژبۆ رزگاركرنا وان، ئه‌م ئاماده و به‌رده‌وامين و گۆت ژی: هه‌ولێن مه ژبۆ ئاڤه‌دانكرنا ده‌ڤه‌رێن ئێزدييان و بپارێزگه‌هكرنا شه‌نگالێ دگه‌ل حكوومه‌تا فيدرالا عيراقێ دێ به‌رده‌وام بن.
ته‌كستا په‌یاما پیرۆزباهیا نێچیرڤان بارزانی ژبۆ ئۆلا ئێزیدییان:
جه‌ژنا سه‌رسالێ (چارشه‌مبا سۆر) ل هه‌موو خوشك و برايێن مه يێن ئێزدى ل كوردستانێ و جيهانێ، پيرۆز دكه‌م. پيرۆزباهييه‌ك تايبه‌ت ژبۆ كه‌سوكارێن قوربانى يێن تيرۆرێ و يێن هه‌تا نها د كا‌مپاندا ژيانا خوه ده‌رباز دكه‌ن. ب هێڤييا كو جه‌ژن و بيرهاتنێن بێن، د ره‌وشه‌كا باشتردا ل مه ڤه‌گه‌ڕن.
ئيسال ژى ديسان جه‌ژن د ده‌مه‌كێدايه، كو ته‌ڤى هه‌موو جيهانێ، كوردستان ژى ژ ده‌ستێ كۆڤيد_19ێ دناليت، هێڤيدرام هه‌ركه‌س پێگرى رێكارێن ته‌ندروستى و خۆپارێزيێ بن. مخابن ته‌ڤى ره‌وشا گرانا ژيانا كامپان، هێشتا چاره‌نڤيسا بێترى دو هزار خوشك و برايێن مه يێن ئێزدى يێن ره‌ڤاندى ژى نه‌دياره.
ئه‌م ديسان هه‌موو ئێزدييان پشتڕاست دكه‌ين هه‌تا دووماهيێ و هندى ئێزدييه‌ك ره‌ڤاندى مابيت، ئه‌م دێ ل په‌ى چاره‌نڤيسێ وان بين و چ پێويسته ژبۆ رزگاركرنا وان، ئه‌م ئاماده و به‌رده‌وامين. هه‌روه‌سا هه‌ولێن مه ژبۆ ئاڤه‌دانكرنا ده‌ڤه‌رێن ئێزدييان و ب پارێزگه‌هكرنا شه‌نگالێ دگه‌ل حكومه‌تا فيدرالا عيراقێ دێ به‌رده‌وام بن.
سه‌رسالا وه هه‌موويان پيرۆز، هه‌ر سال ب خێر و خۆشى.
نێچيرڤان بارزانى
سه‌رۆكێ هه‌رێما كوردستانێ
13/4/2021
H.B