ئەنتۆلۆژیای شیعری ژنانی کوردستان بە فه‌رەنسی بڵاوده‌بێته‌وه
K24 - هه‌ولێر:
نەزەند بەگیخانی به كوردستان24ی راگه‌یاند، دەزگای فه‌رەنسی "هارماتان" و بەشی "نەتەوە و کولتوور و ئەدەبیاتی رۆژهەڵات" خۆشحاڵن به چاپكردن و بڵاوبوونەوەی "ئەنتۆلۆژیای شیعری ژنانی کوردستان بە زمانی فه‌رەنسی، ئاشكراشی كرد، ئەم کتێبە هەڵبژاردەیەکە لە شیعری (30) ژنە شاعیر لە پارچە جیاوازەکانی کوردستان، شیعرەکان دوای بانگەوازێکی کراوە لە رێگه‌ی کەنالەکان و تۆڕی كۆمه‌ڵایه‌تییه‌وه لەلایەن شاعیری کورد "د. ئەحمەدی مەلا"ه‌وە کۆکراونەتەوە و وه‌رگێڕانیان بۆ کراوه.
شاعیری فه‌رەنسی "نیکۆل باریێر"، پێشەکی بۆ كتێبه‌كه نووسیوە و نووسەر "ژێرار شالیان" هەڵیسەنگاندووە، پڕۆژەکە لە ژێر سەرپەرشتی شاعیر "د. نەزەند بەگیخانی"، وەك بەڕێوەبەری بەشی ''نه‌ته‌وه و کولتوور و ئەدەبیاتی رۆژهەڵات'' لە دەزگای هارماتان جێبەجێ کراوە.
دەزگای "هارماتان" یەکێکە لە دەزگا بەناوبانگەکانی چاپ و پەخش لە فه‌رەنسا، کە لە ساڵی (1975)ه‌وه لە پاریس دامەزراوە، بەشی "نەتەوە و کولتووری رۆژهەڵات" لەلایەن پرۆفیسۆر "ئەفرەم یوسف"ه‌وە لە سەدەی رابردوو و سەرەتای سەدەی (21) دامەزراوە.
دوای مەرگی ناوەختەی پرۆفیسۆر یوسف، دکتۆر "نەزەند بەگیخانی"، وەك بەڕێوەبەر و سەرپەرشتیاری ئەم بەشە لەلایەن دەزگای "هارماتان"ەوە دیاری کراوە و ناوەکەشی لە ''نه‌ته‌وه و کولتوور''ی رۆژهەڵاتەوە گۆڕا بۆ ''نه‌ته‌وه و کولتوور و ئەدەبیاتی رۆژهەڵات''، هەر ئەم مانگە کتێبێکی دیکەش لەم بەشەدا بڵاوبووه‌تەوە، کە بریتییە لە "گەڕانەوەی زەردەشت"ی ئەحمەدی مەلا.
نەزەند بەگیخانی، له‌بارەی چاپکردنی ئەم ئەنتۆلۆژیایە لە بەشەکەی ئەودا لە "هارماتان" گوتی: ''کارەکەی من وەک بەڕێوەبەری ئەم زنجیرە کتێبە لە دەزگای "هارماتان" خۆبەخشییە و هەوڵ دەدەم بەوپەڕی ئەمانەتی و مۆرالییەوە لە خزمەتی و کولتوور و زمانانی میللەتانی رۆژهەڵاتی ناوەڕاست، بەتایبەتی بۆ کوردستان بەکاری بهێنم".
گوتیشی: "من تەنیا سەرپەرشتیار و کارئاسانی دەکەم، کاری گەورە و ستایشلێنراو نووسەر و وەرگێڕەکان دەیکەن، کە لێرەوە سوپاسیان دەکەم، ناساندنی ئەدەبیاتی ئەم دەڤەرە بە خوێنەرانی فه‌رەنسا زۆر گرنگە و لەم بارەیەوە بۆشاییەکی گەورە هەیە، هەوڵ دەدەم ئەم کەلێنە پڕ بکەمەوە و دەنگە شاراوە و بێدەنگکراوەکان بە جیهان بگەیەنم".
نەزەند بەگیخانی ئاماژه‌ی به‌وه كرد، "شیعر و داهێنانی ژنانی کوردستان هیچی لە هی ژنانی جیهان کەمتر نییە، بەڵام ئەوان نەک هەر دەرفەتیان بۆ نەڕەخساوە لە جیهانی دەرەوە بناسرێن، بەڵکو لە کوردستانیش لەناو کایەی رۆشنبیریی پیاوسالارانەدا وەکو پێویست نەخوێندراونەتەوە.''
له‌بارەی ئەم ئەنتۆلۆژیایە، "ئەحمەدی مەلا" گوتی: ''ئەم هەڵمەتە ئەدەبییە وەکو هێڵی هاوتەریب لەپاڵ کچانی رۆژئاوا هاتووه‌تە پێشەوە، کە بەدڵ و بە گیان بەرگرییان لە خاك و ئاوی خۆیان کرد".
بڕیارە لە چەند مانگی داهاتوو دوو کتێبی دیکە لەم بەشە بڵاوبێتەوە، کە بریتین لە سەرەتایەك بۆ ئەدەبیاتی کوردیی "محەمەد ئوزون" و "حیکایەتەکانی دەرسیم"ی هونەرمەند "زیا ئایدین"، ئەمەی دواییان بە کرمانجی و فه‌رەنسی بڵاودەبێتەوە.
د.ی