ته‌ندروستی كه‌ركووك بانگه‌وازێكی به‌په‌له‌ ئاراسته‌ی هاووڵاتیانی ئه‌و شاره‌ ده‌كات

تووشبووانی كۆرۆنا به‌لێشاو ده‌چنه‌ نه‌خۆشخانه‌.. یه‌كێك له‌ نه‌خۆشخانه‌كانی تایبه‌ت به‌ كۆرۆنا توانای وه‌رگرتنی نه‌خۆشی زیاتری نه‌ماوه‌
فه‌رمانگه‌ی ته‌ندروستی كه‌ركووك
فه‌رمانگه‌ی ته‌ندروستی كه‌ركووك

K24- هه‌ولێر:

فه‌رمانگه‌ی ته‌ندروستی كه‌ركووك بانگه‌وازێكی به‌په‌له‌ ئاراسته‌ی هاووڵاتییانی سنووری ئه‌و پارێزگایه‌ كرد و رایگه‌یاند، به‌هۆی زۆری ژماره‌ی تووشبووانی كۆرۆنا و سه‌ردانی به‌لێشاو بۆ نه‌خۆشخانه‌كان، یه‌كێك له‌ نه‌خۆشخانه‌كانی تایبه‌ت به‌ چاره‌سه‌ركردنی ئه‌و په‌تایه‌ پڕبووه‌ له‌ كه‌سانی تووشبوو و توانای وه‌رگرتنی هیچ تووشبوویه‌كی دیكه‌ی نه‌ماوه‌.

نه‌بیل حه‌مدی بوشناق، به‌ڕێوه‌به‌ری فه‌رمانگه‌ی ته‌ندروستی كه‌ركووك گوتی: "دوای ئه‌وه‌ی نه‌خۆشخانه‌ی "شیفا 14" پڕبووه‌ له‌ كه‌سانی تووشبوو به‌ حاڵه‌تی توند و مامناوه‌نده‌وه‌، بانگه‌وازێكی به‌په‌له‌ و راسته‌خۆیان ئاراسته‌ی هاووڵاتییانی ئه‌و شاره‌ كردووه‌".

بوشناق داوای له‌ هاووڵاتیان كرد، "به‌ته‌واوی پابه‌ندی رێكاره‌كانی خۆپارێزی بن و به‌مه‌به‌ستی وه‌رگرتنی ڤاكسینی كۆرۆنا له‌پێناو كه‌مكردنه‌وه‌ی رێژه‌ی تووشبوون به‌ په‌تاكه‌ و رزگاركردنی گیانی هاووڵاتییان، سه‌ردانی بنكه‌كانی وه‌رگرتنی ڤاكسین بكه‌ن".

H.B