ئەو کەسانەی ئەم جۆرە گروپە خوێنەیان هەیە ئەگەری جەڵتە تێیاندا زۆرترینە
K24- هەولێر:
گروپی خوێنی مرۆڤ، کاریگەری لەسەر ئەگەری گیرانی موولولەکانی خوێن و کۆبوونەوەی چەوری دەبێت کە دواجار دەبێتەهۆی جەڵتە.
بەگوێرەی توێژینەوەکان، گروپی بی و ئەی، ئەگەری گیرانی موولولەکانی خوێن تێیاندا زۆر زیاترە بە بەروارد بە گروپی خوێنی ئۆ.
یەکێتی تەندروستی دڵی ئەمەریکا بە هاوکاری چەند ناوەندێکی توێژینەوە، تاقیکردنەوە و توێژینەوەی لەسەر 400 هەزار کەس کردووە.
ئەوانەی گروپی خوێنی (بی)ییان هەیە، بە رێژەی 45٪، بە بەروارد بە گروپی خوێنی ئۆ، ئەگەری گیرانی موولەلەکانی خوێن تێیاندا زیاترە و بە رێژەی 55٪، ئەگەری تووشبوونیان بە گیرانی قووڵی دەمارەکان زیاترە.
هەروەها، ئەوانەی گروپی خوێنییان (ئەی)ـە، بە رێژەی 44٪، بە بەروارد بە گروپی خوێنی ئۆ، ئەگەری گیرانی موولەلەکانی خوێن تێیاندا زیاترە و بە رێژەی 50٪، ئەگەری تووشبوونیان بە گیرانی قووڵی دەمارەکان زیاترە.
بەگوێرەی توێژینەوەکە، هۆکاری ئەمە بۆ جۆرێکی پرۆتین بە ناوی ڤی دەبلیو ئێف دەگەڕێتەوە، ئەم پرۆتینە هاوکاری گیرانی موولوولەکانی خوێن دەکات و لە گروپی خوێنی ئۆ، رێژەیان کەمترە بە بەروارد بە ئەی و بی.
ساڵانە لە جیهان، 100 هەزار کەس بەهۆی گیرانی موولوولەکانی خوێن گیان لەدەستدەدەن و ژمارەکەش ساڵ دوای ساڵ لە زیادبووندایە.
American Heart Association journal