هاووڵاتییانی تورکیا لەبڕیاری بایدن بۆ به جینۆساید ناساندنی كوشتاری ئه‌رمه‌ن توڕەن
K24 – ھەولێر:
ناساندنی کۆمەڵکوژی ئەرمەنەکان بە جینۆساید لەلایەن سەرۆکی ئەمەریکاوە کاردانەوەی توندی بەدوای خۆیدا هێناوە. جیا لە ئاستی سیاسی لەسەر ئاستی کۆمەڵایەتیش خەڵکی تورکیای تووڕەکردووە، بەشێوەیەك داوای داخستنی بنکەی سەربازی ئینجەرلیک و دەرکردنی سوپای ئەمەریکا لە تورکیا دەکەن. خۆپیشاندەرە تورکەکان دەڵێن: ئەوەی بایدن دەیکات سەرەتای جێبەجێکردنی پیلانێکی داڕێژراوی ئەمه‌ریکایە بۆ رووخاندن و خۆبەدەستەوەدانی تورکیا.
بایدن بەڵێنەکەی کەمپەینی هەڵبژاردنەکانی گەیاندەجێ و کۆمەڵکوژی زیاتر لە یەک ملیۆن و نیو ئەرمەنیی لە ساڵی 1915 لەلایەن عوسمانیەکانەوە بە جینۆساید ناساند.
لە کاردانەوەی بڕیارەکەی سەرۆکی ئەمەریکاوە، ژمارەیەک خۆپیشاندەری تورک چوونەتە بەردەم کۆنسوڵخانەی ئەمەریکا لە ئیستانبوڵ و داوای داخستنی بنکەی ئاسمانی ئینجەرلیک و دەرچوونی سەربازانی ئەمەریکا لە تورکیا دەکەن.
دیلەک جینار (خۆپیشاندەر) گوتی: "ئەم بابەتە هیچ راستییەکی بۆ نیە، ئێمە باش لەوە ئاگادارین، کە جۆ بایدن جیاواز لە سەرۆکەکانی پێش خۆی لە 24ی نیساندا ئەو دەستەواژەی بەکارهێنا و دەزانین مەبەستی چییە. ئەمە پلانێکە بۆ خستنی تورکیا، بایدن بەم راگەیه‌ندراوەی یەکەم فیشەکی رووخاندنی تورکیای تەقاند. ئێستا دەتوانین بنکەی سەربازی ئینجەرلیک و کورەجەک، کە ئەمەریکا زۆر سوودیان لێوەردەگرێت و دەتوانین ئەو دوو بنکەیە بدەینەوە بە سوپای وڵاتەکەمان. دەکرێت ئەمە بەهێزترین وەڵام بێت بۆ ئەمەریکا."
درووشمی خۆپیشاندەرەکان بریتین: "لە جینۆساید درۆیە و ئەمە پیلانی ئەمریکایە"، "سەربازانی ئەمەریکا لە تورکیا بکەنە دەرەوە"، "وەڵامێک بۆ ئەمەریکا داخستنی ئینجەرلیکە" و "کوڕانی ئەتاتورک هەرماون".
ئیمرە ئۆفلاز (خۆپیشاندەر) گوتی: "ئەوەی بایدن گوتی بەشێکی دانەبڕاوە لەو پیلانەی ئەمەریکا بۆ رووخاندن و خۆبەدەستەوەدانی تورکیا دایڕشتووە. ئەگەر سەیری بنکەکانی ئەمەریکاش بکەیت لە هەموو شوێنیکەوە دەورەی تورکیایانداوە. لە 2014ەوە شەڕی ئەمەریکا و تورکیا دەستپێکردووە. ئێمە وەکو گەنجانی نیشتیمان لێرەین بۆئەوەی وەڵامی پێویستی ئەم راگەیه‌ندراوەی ئەمەریکا بدەینەوە."
پێش بایدن سەرۆکەکانی ئەمەریکا وشەی مێژووی رەش، ئیدانە و چەندین وشە و دەستەواژەی دیکەیان بەکارهێناوە بەڵام خۆیان لە وشەی جینۆساید لاداوە. هەرچەندە هێشتا بایدنیش بە روونی تاوانەکە ناخاتە ئەستۆی تورکیا، بەڵام بە بەراورد بە سەرۆکەکانی پێش خۆی هەنگاوێکی بوێرانە و جیاوازە. دوای 106 ساڵ بووە یەکەم سەرۆکی ئەمەریکا دان بە جینۆسایدی ئەرمەنەکاندا بنێت.
خەڵکی تورکیا ئەم هەنگاوەی ئەمەریکا بە دەستپێکی پیلانێکی مەترسیدار بەرامبەر وڵاتەکەیان دەزانن.