کۆمسیۆنی هەڵبژاردن: سوورین لەسەر ئەنجامدانی هەڵبژاردن لە وادەی دیاریکراوی خۆی
K24 - ههولێر:
کۆمسیۆنی باڵای سەربەخۆی هەڵبژاردن لە عێراق، ئەمڕۆ سێشەممە (27ی نیسان/ ئەپرێلی 2021) رایگەیاند، سوورین لەسەر وادەی دیاریکراوی هەڵبژاردنی پێشوەختە، کە بڕیارە لە ئۆکتۆبەری داهاتوودا بکرێت.
کۆمسیۆنی باڵای سەربەخۆی هەڵبژاردن لە بەیاننامەیەکدا ئاماژەی بەوە کرد، هاوپەیەمانیەتییە سیاسییەکان و حزب و کاندیدەکان دەتوانن تا (1)ی مانگی داهاتوو سوودمەند بن و بتوانن هاوپەیمانیەتی و لیستی کاندیدان لە وادەی دیاریکراو تەواو بکەن.
ئاماژەی بەوەش کرد، بەپێی وادەی دیاریکراو هەنگاوەکانی ئامادەکاری تەواو دەکرێن و دەستکاری خشتەی وادەکەش ناکرێت.
کۆمسیۆنی هەڵبژاردن جەختی کردەوە، دەمانەوێت هەڵبژاردن متمانەی شەقامی عێراقی بەدەستبهێنێت و هاووڵاتیان وەڵامدانەوەیان بۆ هەڵبژاردن هەبێت، لەبەر ئەوەی هەڵبژاردنی داهاتوو گرنگی خۆی هەیە.
رۆژی پەنجشەممەی رابردوو سەرچاوەیەکی عێراقی باس لەوە کردبوو، کە رەنگە هەڵبژاردنی پێشوەختە لە وادەی خۆی دوابخرێت.
سەچاوە: RT
د.ی