سوپای عێراق لە سنووری سووریا خەندەق لێدەدات
عێراق و سووریا بە خەندەق لێک جیا دەکرێنەوە
K24 - هەولێر
سوپای عێراق خەندەقێكی سێ مەتری بە درێژایی سنوورەکانی لەگەڵ سووریا هەڵدەكەنێت.
تەحسین خەفاجی، گوتەبێژ بە ناوی فەرماندەیی ئۆپەراسیۆنە هاوبەشەكانی عێراق رایگەیاند، هەوڵدەدەن لە ماوەی دوو مانگی داهاتوودا هەڵكەندنی خەندەقێك بە قووڵایی 3 مەتر و پانی سێ مەتر، بە درێژایی سنووری لەگەڵ سووریا تەواو بكەن.
خەفاجی، هیواشی خواست ئەم خەندەقە، كۆتایی بە دزەكردنی چەكدارانی داعش لە سووریاوە بۆ ناو خاكی عێراق بێنێت.
ئاماژەی بۆ ئەوەشکرد، هێزەكانی هاوپەیمانان تاوەری چاودێری و تەلیان پێشكەش كردوون، بۆ ئەوەی لە خەندەقەكانی سنووری عێراق - سووریا بەكاریان بێنن.
گوتەبێژ بە ناوی فەرماندەیی ئۆپەراسیۆنە هاوبەشەكانی عێراق راشیگەیاند، لە كۆی 220 كیلۆمەتری سنووری عێراق لەگەڵ سووریا، نزیكەی 140 كیلۆمەتریان تەواو كردووە.