قوتابییەکی کورد لە پێشبڕکێی زمانی رووسی پلەی یەکەمی بەدەستهێنا

K24 - مۆسکۆ

ساڵانە ئۆڵۆمپیادی نێودەوڵەتی زمانی رووسی بەشێوەی ئەلیکترۆنی بۆ هاووڵاتیانی بیانی وڵاتەکە بەڕێوە دەچێت و کتێبخانەی سەرۆکی پێشووی رووسیا، باریس یلسن، لەسەر سێ ئاست هەڵدەستێت بە ئەنجامدانی پێشبڕکێکە، خوازیاران لە تەواوی رووسیاوە دەتوانن بەشداری تێدا بکەن و مەرجی بەشداربوون ئەوەیە خوازیار تەمەنی لەسەروی 14 ساڵەوە بێت.

 رێنوار خەلیل، لاوێکی کوردە و قوتابی قۆناغی سێیەمی کۆلیژی پزیشکییە لە شاری یارۆسڵاڤلی رووسیا، بۆ ئەمساڵ بەشداری پێشبڕکێکە بووە و توانیویەتی سەرجەم هەنگاوەکان ببڕێت و لە ریزی پێشەوەی لیستی براوەکان خۆی ببینێتەوە و لەسەر ئاستی وڵاتانی رۆژهەڵاتی ناوەڕاست پلەی یەکەم بەدەستبهێنێت و لەسەر ئاستی قوتابیانی وڵاتانی سۆڤیەتی پێشووش لە ریزبەندییەکە پلەی چوارەمی گرتووە.          

رێنوار خەلیل، خەڵکی رانیەی باشووری کوردستانە و یەکێکە لەو خوێندکارانەی لەپاڵ خوێندنی پزیشکی، حەزێکی زۆری بۆ زمانی رووسی هەیە و ئاستی زمانەکەی بەرادەیەکی باش بەرەو پێش بردووە.

رێنوار لە لێدوانێکی تایبەت بۆ کوردستان24 رایگەیاند: "دوای بەشداریکردنم لە ئۆڵۆمپیادی زمانی رووسی، کە لەلایەن کتێبخانەی سەرۆکی پێشوی روسیا (باریس یلسن) بە سێ قۆناغ رێکخرابوو، قۆناغی یەکەم : تاقیکردنەوەیەک کە دەبێت کەسی ئارەزوومەند بەشداری  بکات تا داخڵی ئۆڵمپیادەکە ببێت. قۆناغی دووەم: بەهەمان شێوە کەسی سەرکەوتوو، تاقیکردنەوە بکات بۆ قۆناغی سێیەم سەرکەوێت".

رێنوار گوتی: "قۆناغی سێیەم و قورسترین قۆناغ بوو، چونکە بەشێوەی راستەوخۆ  و گفتوگۆ تاقیکردنەوەکە ئەنجامدرا و ئاستەکانی А1، А2، В1 هەبوو، بەرزترین ئاست В1 بوو، من لەم ئاستە تاقیکردنەوەم کرد، لە ساڵی  2020 دەستمان پێکرد و لە مانگی 3ی 2021 کۆتای پێهات، بەڵام چەند رۆژێک لەمەوبەر ئەنجامەکان راگەیەنران".

رێنوار، ئاماژەی بەوەشکرد "توانیم لەسەر ئاستی وڵاتانی یەکێتی سۆڤیەتی پێشوو  پلەی 4 و لە نێو قوتابیانی وڵاتانی رۆژهەڵاتی ناوەڕاستیش بە نمرەی 58 توانیم پلەی یەکەم بەدەست بێنم، کە خاڵەکان بەمشێوەیە:..

1- ئەنەستەسیا ئەلێگەفنا ( کازاخستان) نمرە 61

2- ئەمیر خان(کیرگیزستان) 61

3- جۆرجینا ئەدێمی (کیرگیزستان) 60

4- پەلینا یوریفنا (کازاخستان 59

5- رێنوار خەلیل عەلی (عێراق) 58

6- ئەنەستەسیا فیۆدەرەفنا(ئۆکرانیا) 57.