لیژنەی ئابووری: حکومەت لە چارەسەر کردنی دۆخی ئابووری شکستیهێنا

نەدا شاکر: عێراق کەوتووەتە دۆخی داڕمانێکی گەورەی ئابووری
بازاڕی عێراق
بازاڕی عێراق

K24 – ھەولێر:

نەدا شاکر، ئەندامی لیژنەی ئابووری لە پەرلەمانی عێراق هۆشداری لە داکەوتنێکی گەورەی ئابووری دا، کە بەرۆکی بازاڕەکانی گرتووە و هۆکارەکەشی بۆ سیاسەتی حکومەت گەڕاندەوە. 

ئەو پەرلەمانتارە گوتی: "چەند هەفتەیەکە بازاڕەکان دووچاری داکەوتن بوونەتەوە و چالاکییەکان بۆ کەمترین ئاست دابەزیون، ئەوەش ئاماژەیەکی نەرێنییە لەسەر دۆخی ئابوورییە داڕماوەکەی وڵات، كە بەهۆیەوە ملیۆنان عێراقی لەسەرجەم پارێزگاکانی باجی دەدەن.

گوتیشی: سیاسەتی حکومەت بۆ رێگریکردن لە گرانی و کۆنترۆڵکردنی نرخ شکستیهێناوە، تەنانەت تاوەکو ئێستا میکانیزمێکی روونی نییە بۆ ئەوەی رێگری لە بەرزبوونەوەی نرخەکان بکات، ئەمەش وایکردووە رێژەی هەژاری و بێکاری دوو هێندە بن. 

نەدا شاکر ئاماژە بەوە دەدات، ئەو دیمەنەی بەرپرسانی دەوڵەت دەیبینن؛ رەنگدانەوەی ئەو دۆخە خراپە ئابوورییە نییە، ئەو کاریگەرییە گەورەیە نیشان نادات کە کاریگەری کردووەتە سەر هەژاران.

ئاماژەشیكرد، رۆژ لە دوای رۆژ بەهۆی نەبوونی دیدگای ستراتیژی حکومەت دۆخەکە ئاڵۆزتر دەكات، تا دێت بە دابەزاندنی بەهای دینار نرخەکان گرانتر دەبن.