سەرۆک بارزانی: داعش لەرووی سەربازییەوە تێکشکاوە، بەڵام ریشەکێشکردنی داعش ھەوڵی ھەمە لایەنەی پێویستە
K24 - ههولێر:
رۆژی چوارشەممە 5ـی ئایاری 2021 لە سەلاحەددین سەرۆک مەسعود بارزانی پێشوازی لە سامی سامسەن فەریقی ھێزی ئاسمانی و راوێژکاری وەزارەتی بەرگری بەریتانیا بۆ کاروباری ڕۆژھەڵاتی ناوەڕاست و باکوری ئەفریقییا و شاندێکی یاوەری کرد، کە پێکھاتبوو لە ستیڤن ھیکی باڵیۆزی بەریتانیا لە عێراق و جیمز سرونتن کونسولی بەریتانیا لە ھەولێر و ژمارەیەک لە ڕاوێژکارانی سەربازی بەریتانیا .
لەو کۆبونەوەیەدا کە ھۆشیار زێباری و مەحمود محەمەد و ئەندامانی مەکتەبی سیاسی پارتی دیموکراتی کوردستان ئامادەی بوون. شاندی میوان جەختیان لەوەکردەوە کە سەقامگیری و بوژانەوەی ھەرێمی کوردستان و بەلای بەریتانیا بایەخێکی زۆری ھەیە، ئەمەشیان خستەڕوو کە بەریتانیا خوازیاری ئەوەیە لە چارەسەرکردنی کێشەکان و تێپەڕاندنی تەحەدیاتی بەردەم عێراق و ھەرێمی کوردستان ڕۆلی خۆی بگێڕێت.
ھەر لەو دیدارەدا بارودۆخی سیاسی عێراق و ناوچەکە و ھەڵبژاردنەکانی داھاتووی عێراق و ھەڕەشەکانی تیرۆر تاوتوێ کران و پەیوەست بە ڕووبەرووبوونەوەی داعش سەرۆک بارزانی جەختی لەوە کردەوە کە ڕاستە داعش لەرووی سەربازیەوە تێکشکاوە، بەڵام ریشەکێشکردنی داعش ھەوڵی ھەمە لایەنەی پێویستە و دەبێ ئەو ھۆکارانەش نەمێنن کە بوونەتە ھۆی سەرھەڵدانی داعش و پێویستە لەرووی فکری و ئابووری و کۆمەڵایەتیشەوە شەڕی تیرۆر بکرێت.