یاریزانانی یوڤێنتۆس كوده‌تا به‌سه‌ر كریستیانۆ ده‌كه‌ن
سه‌رچاوه‌یه‌كی راگه‌یاندنی ئیتاڵیا ئاشكرای كردووه كه یاریزانانی یوڤێنتۆس له ژووری جلگۆڕین كوده‌تایان به‌سه‌ر كریستیانۆ رۆناڵدۆ كردووه و له دژی ئه‌و ئه‌ستێره پورتوگالییه هه‌ڵگه‌ڕاونه‌ته‌وه.
رۆژنامه‌ی لاگازێتا دیللۆ سپۆرتی ئیتاڵیا له راپۆرته هه‌واڵێكدا نووسیویه‌تی: نێوانی كریستیانۆ و یاریزانه‌كانی دیكه‌ی یوڤی له ژووری جلگۆڕین تا دێت زیاتر خراپتر ده‌بێت.
یاریزانانی یوڤێنتۆس له‌و ڕه‌فتارانه‌ی كریستیانۆ توڕه‌ن، به‌وپێیه‌ی زۆرترین رێزی لێ ده‌گیردرێت و كه‌مترین پابه‌ندبوونی به راهێنانه‌كان هه‌یه.
سه‌رچاوه‌كه نووسیویه‌تی: یوڤێنتۆس دوای ئه‌وه‌ی (0 ـ 3) به‌رامبه‌ر میلان دۆڕا، كریستیانۆ رۆژی دواتر نه‌هاته راهێنانه‌كان و دواتر له‌گه‌ڵ ئاندرێ ئانێلی سه‌رۆكی یانه‌ی یوڤێنتۆس سه‌ردانی پێشانگایه‌كی فیراری كرد بووو.
كریستیانۆ رۆناڵدۆ ئه‌م وه‌رزه له‌گه‌ڵ یانه‌ی یوڤێنتۆس له قۆناخی هه‌شتی چامپیۆنزلیگ ماڵئاواییان كرد و نازناوی ئه‌م وه‌رزه‌ی سێریا ئه‌ی له‌ده‌ستدا و ئێستا شه‌ڕی بڕینی بلیتێكی چامپیۆنزلیگ ده‌كات.
سه‌رچاوه‌كه ئاماژه‌ی بۆ ئه‌وه كردووه كه ئه‌و سه‌ربه‌ستی و خۆپه‌رستییه‌ی كریستیانۆ رۆناڵدۆ هه‌یه‌تی یاریزانه‌كانی یوڤی بێزار كردووه و ئێستا وه‌كو جاران كریستیانۆیان خۆشناوێت و په‌یوه‌ندییان به‌ره‌و خراپی رۆیشتووه.
كریستیانۆ رۆناڵدۆی ته‌مه‌ن 36 ساڵ دوای تێپه‌ڕكردنی 9 وه‌رز له‌گه‌ڵ ریال مه‌درید و بردنه‌وه‌ی 4 نازناوی چامپیۆنزلیگ له هاوینی 2018 به به‌های 100 ملیۆن یۆرۆ روویكرده یانه‌ی یوڤێنتۆس، له‌گه‌ڵ یانه‌ی خانمه پیره‌كه له كۆی 130 یاری، 99 گۆڵ و 22 ئاسیستی كرد.