وەزیری دارایی و ئابووری: پێویسته پارێزگاری له داهاتی گومرگه‌كان بكه‌ین
K24 – هه‌ولێر:
ئه‌مڕۆ وەزیری دارایی و ئابووری حكومه‌تی هه‌رێمی كوردستان، ئاوات جه‌ناب نوری، لەگەڵ بەڕێوبەری گشتی گومرگی هەرێمی كوردستان و سەرجەم بەڕێوبەرەكانی گومرگ لەسەر زیادكردنی داهات و جوڵەی بازرگانی كۆبوونەوە.
لەسەرەتای كۆبوونەوەكە، ئاوات جەناب نوری وەزیری دارایی و ئابووری باسی ئاستەنگەكانی بەردەم كاری بازرگانی كرد لە هەرێمی كوردستان و بەڵێنی ئەوەیدا، هەموومان پێكەوە دەتوانین كاری باشتر بكەین لە پێناو زیادكردنی جوڵەی بازرگانی و بە ئامانجی زیادكردنی داهات.
هەر لەو كۆبوونەوەیەدا، ساماڵ عەبدولڕەحمان بەڕێوبەری گشتی گومرگی هەرێمی كوردستان. بە وردی باسی ئاستەنگەكانی كرد و پێكەوە رێگاچارەسەری گونجاویان دەستنیشانكرد تاوەكو لەو رێگەیەوە، رێ و شوێنی پێویست بۆ ئاسانکاری و لابردنی ئاستەنگەكان لە پێناو باشتر کردن و زیاد کردنی جووڵەی بازرگانی و داهات، بكرێت.
لە كۆتایی كۆبوونەوەكەشدا، ئاوات جەناب نوری وەزیری دارایی و ئابووری، جەختی لەوە كردەوە، كە گومرك سەرچاوەیەكی گرنگی داهاتە لە هەرێمی كوردستان دەبێت بە هەموومانەوە پارێزگاری لەو داهاتە گرنگە بكەین.