عێراق.. تووشبوون به‌ كۆرۆنا ژماره‌یه‌كی پێوانه‌یی تۆماركرد

به‌هۆی په‌تاكه‌ 35 كه‌س گیانیان له‌ده‌ستدا و ئاماری رۆژانه‌ی تووشبوونیش له‌ هه‌ڵكشانه‌
دۆخی ته‌ندروستی له‌ عێراق
دۆخی ته‌ندروستی له‌ عێراق

K24- هه‌ولێر:

وه‌زاره‌تی ته‌ندروستیی عێراق ئاماری 24 كاتژمێری رابردووی تووشبوون، مردن و چاكبوونه‌وه‌ی كۆرۆنای له‌سه‌رانسه‌ری وڵات به‌پارێزگاكانی هه‌رێمی كوردستانیشه‌وه‌ راگه‌یاند و به‌گوێره‌ی ئاماره‌كه‌، له‌ماوه‌ی 24 كاتژمێری رابردوودا پشكنینی پزیشكی بۆ 49 هه‌زار و 449 كه‌س ئه‌نجامدراوه‌ و تووشبوونی 6 هه‌زار و 558 كه‌سی دیكه‌ به‌ په‌تاكه‌ پشتڕاست كرایه‌وه.‌ زۆرترین ژماره‌ی تووشبوونی ئه‌مڕۆش له ناوچه‌ی كه‌رخی شاری به‌غدا‌ تۆماركرا، كه‌ بریتییه‌ له‌ هه‌زار و 15 حاڵه‌ت.

وه‌ك له ‌راگه‌یه‌ندراوه‌كه‌دا هاتووه‌، له‌ماوه‌ی شه‌و و رۆژێكدا 35 كه‌س به‌هۆی په‌تاكه‌ گیانیان له‌ده‌ستداوه و 5 هه‌زار و 55 حاڵه‌تی چاكبوونه‌وه‌ش له‌په‌تاكه‌ راگه‌یه‌ندراوه‌.

تا ئێستا كۆی ئه‌وانه‌ی له‌سه‌رانسه‌ری عێراق تووشی په‌تاكه‌ بوونه، ژماره‌یان گه‌یشته‌ ملیۆنێك و 338 هه‌زار و 604 حاڵه‌ت، له‌و ژماره‌یه‌ش 17 هه‌زار و 156 كه‌س به‌هۆی ڤایرۆسه‌كه‌وه‌ گیانیان له‌ده‌ستداوه، ملیۆنێك و 240 هه‌زار و 978 كه‌سیش به‌ رێژه‌ی 92.7% به‌ته‌واوی چاك بوونه‌ته‌وه و 80 هه‌زار و 470 كه‌سیش له نه‌خۆشخانه‌كان له‌ژێر چاودێری پزیشكیدان، له‌و ژماره‌یه‌ش 625 كه‌س به‌هۆی ناجێگیری دۆخی ته‌ندروستییان له‌ژێر چاودێری چڕی پزیشكیدان.

ئاماژه‌ به‌وه‌ش دراوه‌، تا ئێستا 879 هه‌زار و 187 كه‌س له‌ سه‌رانسه‌ری عێراق ڤاكسینی كۆرۆنایان وه‌رگرتووه‌.

H.B