ڤاكسینێكی كۆرۆنا به‌رهه‌مدێت كه له رێگه‌ی ده‌مه‌وه به‌كاردێت
K24 - هه‌ولێر:
رۆژنامه‌ی "تایمز ئۆف ئیسرائیل" بڵاویكرده‌وه، كۆمپانیایه‌كی ئیسرائیلی ڤاكسینێكی كۆرۆنای به‌رهه‌مهێناوه، كه له رێگه‌ی ده‌مه‌وه به‌كاردێت، پێشبینی ده‌كرێت تاقیكردنه‌وه سه‌ره‌تاییه‌كان دوای مانگێكی دیكه له ته‌لئه‌ڤیڤ ده‌ستپێبكات.
رۆژنامه ئیسرائیلییه‌كه ئاماژه‌ی به‌وه كرد، ئه‌و ڤاكسینه سه‌ركه‌وتنی به‌ده‌ستهێناوه و له‌سه‌ر به‌راز تاقیكراوه‌ته‌وه، مانگی داهاتووش تاقیكردنه‌وه‌ی زیاتری له‌سه‌ر ده‌كرێت.
ئاماژه‌ی به‌وه‌ش كرد، كۆمپانیای "ئۆرامید"ی تایبه‌ت به درووستكردنی ده‌رمان په‌ره‌ی به ڤاكسینه‌كه داوه كه له رێگه‌ی ده‌مه‌وه به‌كاردێت، ئه‌و ڤاكسینه به‌هاوبه‌شی له‌گه‌ڵ كۆمپانیای "بریماس بیۆنتیك"ی هیندی په‌ره‌ی پێدراوه.
كۆمپانیای "ئۆرامید" ره‌زامه‌ندی سه‌رنته‌ری "سۆراسكی"ی پزیشكی له ته‌لئه‌ڤیڤ وه‌رگرتووه، تا پشكنینی تاقیگه‌یی له‌سه‌ر بكرێت، بۆ ئه‌مه‌ش 24 خۆبه‌خش ڤاكسینه‌كه‌یان پێده‌درێت، چاودێریان ده‌كرێت بۆ ئه‌وه‌ی بزانرێت ئه‌و ڤاكسینه سیسته‌می به‌رگریان به‌هێزده‌كات به‌رامبه‌ر به ڤایرۆسی كۆرۆنا، له‌گه‌ڵ ئه‌وه‌ش رێژه‌ی دژه‌ته‌نی ڤایرۆسه‌كه پێوانه ده‌كرێت.
نیداف كیدرۆن، به‌ڕێوه‌به‌ری جێبه‌جێكاری كۆمپانیای "ئۆرامید" روونیكرده‌وه، به‌رهه‌مهێنانی ئه‌و ڤاكسینه، ره‌وشه‌كه پێچه‌وانه ده‌كاته‌وه، بۆ نموونه له هیندستان، كه تا ئێستا 5%ی دانیشتوانه‌كه‌ی ڤاكسینی كۆرۆنایان وه‌رگرتووه.
ئاماژه‌ی به‌وه‌ش كرد، ئه‌و ڤاكسینه توانای رووبه‌ڕووبوونه‌وه‌ی په‌تای دێلتای هه‌یه، له‌به‌ر ئه‌وه‌ی له 3 پرۆتین پێكهاتووه، له‌جیاتی 1 پرۆتین، به‌مه‌ش ده‌توانێت به‌رگری به‌رامبه‌ر ڤایرۆسی سارس- كۆڤ-2 بوه‌ستێته‌وه.
