سەرۆك بارزانی پێشوازی لە شاندی ئەنجوومەنی لاوانی كوردستان دەكات

K24- هه‌ولێر:

رۆژی سێشەممە 27ـی تەمووزی 2021 لە سەلاحەددین، سەرۆك مەسعود بارزانی پێشوازی لە شاندی ئەنجوومەنی لاوانی كوردستان كرد، كە لە سەرۆكی ئەنجوومەن و نوێنەری یازدە رێكخراوی جەماوەریی لاوانی لایەنەكان و پێكهاتەكان و هەروەها نوێنەرانی رێكخراوە ناحكومییەكانی بواری كاروباری لاوان پێكهاتبوو.

لە دیدارەكەدا شاندی میوان كورتەیەكیان لەبارەی كار و چالاكییەكانیان و هەروەها پلان و بەرنامەی ئەنجوومەنی لاوانی كوردستان لەمەڕ پرسی بێكاریی لاوان و مەترسیی ماددە هۆشبەرەكان و بەهێزكردنی ئینتیمای نەتەوەیی و رێكخستنەوەی كاروباری لاوان ئەویش لە نێو چوارچێوەیەكی هاوبەش بۆ سەرۆك بارزانی خستەڕوو و داواشیان كرد سەرۆك بارزانی پشتیوانی هەوڵ و چالاكییەكانیان بێت.

هەر لەو كۆبوونەوەیەدا سەرۆك بارزانی كاری هاوبەشی رێكخراوەكانی لاوانی بە هەنگاوێكی زۆر باش وەسف كرد و دەستخۆشیی لێ كردن و پاڵپشتیی خۆشی بۆ كارەكانیان راگەیاند. لە درێژەی ئەو دانیشتنەدا سەرۆك بارزانی لەبارەی پرسە سیاسیەكان و تەحەددیاتی بەردەم لاوان و ئاسۆكانی داهاتوو، ئامۆژگاری و روونكردنەوەی پێویستی بۆ شاندی ئەنجوومەنی لاوانی كوردستان خستەڕوو.

H.B