وریای ته‌ندرووستی دڵت به
K24 – هه‌ولێر:
له دیارترین نیشانه‌كانی جه‌ڵته‌ی دڵ، ئه‌وه‌یه كه‌سه‌كه هه‌ست به ئازارێكی توند و زۆر له سینگیدا ده‌كات و هه‌ناسه هه‌ڵكێشان و دانه‌وه‌ی قورس ده‌بێت و هه‌ست ده‌كات نه‌خۆشه، ئه‌گه‌ر كه‌سێك ئه‌م نیشانه‌ی هه‌بوو، ده‌بێت فریای خۆی بكه‌وێت.
هه‌ندێكجار نیشانه‌كان له ده‌ره‌وه‌ی جه‌سته و به تایبه‌تی له‌سه‌ر پێست ده‌رده‌كه‌ون. ئه‌و نیشانانه ئاسایی نین و كاتێك ده‌ركه‌وتن، پێویسته زوو خۆت پیشانی پزیشكی تایبه‌تمه‌ند و به ئه‌زموون و شاره‌زا بده‌یت.
هه‌ندێكجار نه‌خۆشییه‌كانی دڵ ده‌بنه هۆی ئه‌وه‌ی شله‌مه‌نی زیاتر له خواره‌وه‌ی جه‌سته به تایبه‌تی له هه‌ردوو قاچدا و خوار ئه‌ژنۆ به تایبه‌تی كۆببێته‌وه. هه‌ندێك له نه‌خۆشه‌كان خه‌تی شین و ئه‌رخه‌وانی به درێژایی قاچ و قولیاندا ده‌رده‌كه‌ون، چونكه ده‌ماره‌كانیان گیراوه و كۆلیسترۆڵ له خوێنیان زیادی كردووه.
سه‌نته‌ری فلۆریدا بۆ نه‌خۆشییه‌كانی پێست و شێرپه‌نجه‌ی پێست (FLDSCC) رایگه‌یاند، ئه‌وانه‌ی گرفتاری نه‌خۆشی شه‌كره‌ن زۆرتر تووشی هه‌ڵگه‌ڕانی پێست و به مۆم بوونی ده‌بن و پێستیان سوور هه‌ڵده‌گه‌ڕێت و له كاتی ده‌ركه‌وتنی ئه‌م نیشانه‌یه ئه‌وا ئاماژه‌یه‌كی روونه بۆ تووشبوونی كه‌سه‌كه به نه‌خۆشی دڵ.
هه‌روه‌ها ئه‌گه‌ر هێڵی سوور و ئه‌رخه‌وانی له نینۆكه‌كانی ده‌ست و پێیدا ده‌ركه‌وت، واته حاڵه‌تی نه‌خۆشیی دڵی كه‌سه‌كه گه‌یشتووه‌ته راده‌یه‌كی مه‌ترسیدار.
به گشتی نیشانه‌كانی جه‌ڵته‌ی دڵ، كه زۆر باو و بڵاون، ئازاری سینگه، ئازاری قۆڵ و باسكه، له ناكاو سه‌رگێژبوون و هه‌ستكردن به هێڵنجدان.
ده‌كرێت به گۆڕینی سیستمی خواردن و وه‌رزش كردن و كه‌مكردنه‌وه‌ی شه‌كر و چه‌وری و خوێ و زیادكردنی میوه و سه‌وزه له ژه‌مه‌كانی خواردندا رێگه له تووشبوون به زۆرینه‌ی ره‌های نه‌خۆشییه‌كانی دڵ بگریت.
بۆ ئاگاداربوون له هه‌واڵه‌كانی كوردستان24 سه‌بسكرایبی چه‌ناڵی كوردستان24 له تێلیگرام بكه‌ن