له ئێران 3 مليۆن و نيو قوتابى له خوێندن بێبه‌ش ده‌كرێن
K24 – هه‌ولێر:
زیاتر لە 3 ملیۆن و 500 ھەزار قوتابی لە ئێران و رۆژهەڵاتی کوردستان وازیان لە خوێندن هێناوە، ئەگەرچی ئێستا بەپێی یاسا ئەو دایك و باوكانەی گوشار بۆ منداڵەكانیان دەھێنن بۆئەوەی واز لە خوێندن بھێنن، سزا دەدرێن، بەڵام چالاكان دەڵێن ھەژاری و دەستكورتی وایان كردووە رێژەیان بەردەوام زیاتر بێت.
خۆیان برسین و بۆ تێركردنی سکی منداڵەكانیان ناچاریان دەكەن دەستبەرداری خوێندن بن، ئەوە چیرۆكی سەدان ھەزار دایك و باوكی ئێران و رۆژھەڵاتی كوردستانە، كە ئێستا گوشار بۆ منداڵەكانیان دەھێنن بۆ ئەوەی تێچووی خوێندنیان لە ئازارێكی دیكە بدەن.
عەلی باقرزادە یاریدەدەری وەزیری پەروەردەی ئێران بە ھەواڵدەری مێھری گوتووە، كە بەسەدان دایك و باوكیان سزا داوە، كە رێگەیان لە خوێندنی منداڵەكانیان گرتووە.
بەپێی ماددەی 4-ی یاسای پاراستنی منداڵان، ھەر دایك و باوكێك رێگە لە خوێندنی منداڵان بگرێت، سێ ھەتا شەش مانگ دەستبەسەر دەكرێت و یەك ملیۆن تمەنیش سزا دەدرێت.
ئەگەرچی بەپێی ماددەی 30 لە دەستووری ئێران دەوڵەت دەبێ ھەموو خزمەتگوزارییەكی بێ بەرامبەر بۆ خوێندنی ناوەندی و دواناوەندی دابین بكات، بەڵام لەگەڵ ئەوەش 3 ملیۆن و 600 ھەزار منداڵ لە خوێندن بێ بەشكراون و نزیكەی 500 ھەزاریش ھی رۆژھەڵاتی كوردستانن.
زۆرینەی رەھای ئەو كەسانەی لە خوێندن بێ بەری كراون، بەھۆی ھەژاری و نەداری بووە و راستەوخۆ دایك و باوكیان رێگەی خوێندنیان لێ گرتوون.
تاكوو ئێستا بنەماڵەكان رێگەیان لە 35 ھەزار قەتابی ناوەندی و 180 ھەزار قوتابی دوا ناوەندی گرتووە لەخوێندن بەردەوام بن.
ھەژاری خێزان و گرانی بژێوی ژیان ھۆكاری سەرەكی بەردەوامنەبوونی قوتابیانی ئێرانە لە خوێندن و زۆربەی ئەو رێژەیەش ھی پارێزگاكانی سەر سنوورە و ھەر 5 پارێزگای رۆژھەڵاتی كوردستانیش لەسەر سنوورن و منداڵان و تازە پێگەیشتووەكان زۆربەیان لەپێناو كۆڵبەریی و بۆ دابینكردنی دانی سەر سفرەی ئێواران دەستبەرداری خوێندن دەبن.