بۆریەکی نەوت لە سنووری سەرگەڕان تەقێندرایەوە
K24 – هەولێر
بۆریەکی نەوت لە سنوور شارەدێی سەرگەڕانی سەر بە کەرکووک تەقێندرایەوە.
ئەفسەرێکی پۆلیسی نەوتی عێراق لە سنوورەکە بە کوردستان24ی راگەیاند: "ئەمڕۆ بیرە نەوتی ژمارە 87 لە گوندی سێبیران لە سنووری قەرەچوغ، سەر بە شارەدێی سەرگەڕان، لەڕێگەی بۆمبێکی چێنراو تەقێندرایەوە".
گوتیشی: "بیرەکە ئاگری نەگرتووە، بەڵام بۆریەکە شکاوە و نەوتێکی زۆری لێدەڕواو بەناوچەکەدا بڵاوبووەتەوە".
بەرهەمی رۆژانەی ئەو بیرە نزیکەی 1500 بەرمیل نەوتە و هەناردەکردن تێیدا راگیڕاوە، زیانی رۆژانەشی 105000 دۆلارە.