بڕوانامەی رێزلێنان دەبەخشرێتە مامۆستا نەسرین مەرجان
K24 - هەولێر
وەزارەتی رۆشنبیری و لاوان و پارێزگای هەولێر، بڕوانامەی رێزلێنانی دەبەخشنە مامۆستا نەسرین مەرجان، وەک یەکەم ئافرەتی هەولێرە، کە دەرچووی ئەکادیمیای هونەرە جوانەکانی بەغدا- بەشی شێوەکارییە، و زیاتر لە 50 ساڵە خزمەت بە پەروەردە و هونەر دەکات.
ئەمڕۆ دووشەممە 30/8/2021، فەرهەنگ غەفوور، بەڕێوەبەری گشتی رۆشنبیری و هونەری هەولێر، بە یاوەری سەلیم قادر، جێگری بەڕێوەبەری گشتی و ئازاد لەشکری، بەڕێوەبەری هونەری شێوەکاری بەوەکالەت، لە ماڵەوە سـەردانی هونەرمەندی شێوەکاری دێرینی هەولێر، خاتوو (نەسرین خدر مەرجان)یان کرد، وێڕای هەواڵپرسین لە دۆخی تەندروستییان، لە بەرامبەر ئەو ئەزموون و بەخششەی هەیەتی، هەروەها وەک یەکەم ئافرەتی هەولێر، کە دەرچووی ئەکادیمیای هونەرە جوانەکانی بەغدا- بەشی شێوەکارییە، بڕوانامەی رێزلێنانی بەڕێوەبەرایەتی گشتی رۆشنبیری و هونەری هەولێریان پێشکەش کرد و هیوای تەمەندرێژی و سەرکەوتنیان بۆ خواست، کە تا هەنووکەش لە کارە هونەرییەکانی هەر بەردەوامە.
هەروەها بڕوانامەی رێزلێنانی هەریەکە لە پارێزگای هەولێر و وەزارەتی رۆشنبیرییان گەیاندە دەست مامۆستا نەسرین مەرجان.
مامۆستا نەسرین مەرجان، خوشکی هونەرمەندانی کۆچکردو (یەحیا مەرجان و واحید مەرجان)ە، لە ساڵی 1975 بڕوانامەی لە پەیمانگای هونەرە جوانەکانی بەغدا، بەشی شێوەکاری وەرگرتووە. لە بواری هونەری و پەروەردەییدا لەماوەی ئەو پەنجا ساڵەیەدا، رۆڵێکی باشی لە شاری هەولێردا هەبووە و چالاکییە هونەرییەکانیشی تائێستا هەر بەردەوامن.