هاووڵاتیان چاویان لە گەڕانەوەی هێزەکانی پێشمەرگەیه‌

دوای کشانەوەی هێزەکانی پێشمەرگە تا کۆتایی ساڵی رابردوو، 4 هه‌زار و 887 کردەوەی تیرۆریستی له‌ ناوچه‌ كوردستانییه‌كان ئەنجامدراون

K24- هه‌ولێر:

لە دوای کشانەوەی هێزەکانی پێشمەرگە لە ئۆکتۆبەری ساڵی 2017 تا کۆتایی ساڵی 2020، داعش (4887) کردەوەی تیرۆریستی لە سنووری پارێزگای کەرکووك لەدژی هێزە ئەمنییەکان و هاووڵاتیان ئەنجامداوە، دواترینیان هێرشەکەی سەر گوندی "شەحەلی کۆن"‌ لە سنووری سەرگەڕان و گوندی "سوهێل" بوو لە سنووری داقوق، کە شەهیدێك و 19 برینداری لێکەوتەوە و چارەنووسی کەسێکیش نادیارە، بۆ چارەسەرکردنی دۆخەکەش هاووڵاتیان چاویان لە گەڕانەوەی پێشمەرگەیە.

له‌ کردەوە تیرۆریستییه‌كه‌ی چەند رۆژی رابردووی گوندێكی سنووری شارۆچکەی داقوق، كه‌ ژمارەیەك هاووڵاتی كرده‌ قوربانی، كوردستان24 سه‌ردانی ماڵی چالاک نووری ده‌كات، كه‌ شاهێدحاڵی رووداوه‌كه‌یه‌ و یەکێكه‌ لە بریندارەکان، ئێستا تەندرووستی بەرەو باشییە، لەگەڵ (9) هاوەڵی دیکەی لەکاتی درووستکردنی خاڵێکی سەربازی لەگوندی "سوهێل" بۆمبێکی چێنراوی داعش پێیاندا تەقییەوە، رووداوەکە شەهیدێك و (12) برینداری لێکەوتەوە، کە سێ لە بریندارەکان پۆلیسی فیدراڵ بوون.

بە گوتەی هاووڵاتیان داعش لە سنوورەکە مەترسی گەورەیە لەسەر ژیانیان، بۆچارەسەری ئەمەش داوای بەشداریپێکردنی پێشمەرگە دەکەن لە مەلەفی ئەمنیدا.

زارا حەسەن-ی گوندنشین گوتی: "تا پێشمه‌رگه‌ نه‌یه‌ته‌وه‌، ئێمه‌ ده‌ترسین، هه‌زار چه‌كدار بێنن، ئێمه‌ نایانناسین، هه‌ر چه‌نده‌ هه‌ر شه‌ش كوڕه‌كه‌م پێشمه‌رگه‌یه‌، به‌ڵام شه‌ش كوڕی دیكه‌ش هه‌بووایه‌، ده‌مكرده‌ پێشمه‌رگه‌، له‌به‌ر ئه‌وه‌ی لای خوا پیرۆزه‌".

جموجۆڵەکانی داعش بەهۆی بوونی بۆشایی ئەمنی و ناشارەزایی ئەو هێزانەی لەدوای شانزەی ئۆکتۆبەرەوە لە جوگرافیای ناوچەکە جێگیرکراون، هۆکاری زیادبوونی پەلامارەکانی داعشە لە سنووری ناوچەکانی مادەی 140 کە بەپێی ئامارێکی بەشی راگەیاندنی ئاسایشی کەرکووك لەدوای کشانەوەی هێزەکانی پێشمەرگە تا کۆتایی ساڵی رابردوو، 4 هه‌زار و 887 کردەوەی تیرۆریستی ئەنجامدراون.

د.ی