په‌يامێك له‌ سه‌رۆكى هه‌رێمى كوردستانه‌وه‌

"دوای هه‌ڵبژاردن هه‌موومان ئامانجمان ئه‌وه‌یه‌ له‌ به‌غدا پێكه‌وه‌ كاربكه‌ین بۆ پته‌وكردنى ديموكراسى"
نێچيرڤان بارزانى، سه‌رۆكى هه‌رێمى كوردستان
نێچيرڤان بارزانى، سه‌رۆكى هه‌رێمى كوردستان

K24- هه‌ولێر:

نێچیرڤان بارزانی، سه‌رۆكی هه‌رێمی كوردستان ئه‌مڕۆ هه‌ینی (10ی ئه‌یلوول/ سێپتێمبه‌ری 2021) له‌ په‌یامێكدا رایگه‌یاند، له‌ كاتێكی به‌ڕێوه‌چوونی بانگه‌شه‌ى هه‌ڵبژاردنى (10)ى ئۆكتۆبه‌رى داهاتوو له‌ عێراق و هه‌رێمى كوردستان، داوا له‌ هه‌موو لايه‌ك ده‌كه‌م بانگه‌شه‌يه‌كى مه‌ده‌نيانه‌ى ئارام له‌ ئاستێكى به‌رزدا ئه‌نجام بده‌ن.

له‌ په‌یامه‌كه‌ی نێچیرڤان بارزانی هاتووه‌، هه‌موو حزب و لايه‌نه‌ سياسييه‌كان ده‌بێت ئه‌وه‌يان له‌بيربێت، كه‌ دوای هه‌ڵبژاردن هه‌موومان ئامانجمان ئه‌وه‌یه‌ له‌ به‌غدا پێكه‌وه‌ كاربكه‌ین بۆ پته‌وكردنى ديموكراسى، به‌رژه‌وه‌ندیيه‌كانی عێراق به‌گشتی و به‌ده‌ستهێنان و پاراستنی مافه‌ ده‌ستوورييه‌كانی هه‌رێمى كوردستان به‌تایبه‌تی.

ده‌قی په‌یامه‌كه‌ی سه‌رۆكی هه‌رێمی كوردستان:

كوردستانييانى خۆشه‌ويست

هاووڵاتيانى ئازيز له‌ هه‌رێمى كوردستان و عێراق

له‌ كاتێكدا بانگه‌شه‌ى هه‌ڵبژاردنه‌كانى (10)ى ئۆكتۆبه‌رى داهاتوو له‌ عێراق و هه‌رێمى كوردستان به‌ڕێوه‌ده‌چێت، داوا له‌ هه‌موو لايه‌ك ده‌كه‌م بانگه‌شه‌يه‌كى مه‌ده‌نيانه‌ى ئارام له‌ ئاستێكى به‌رزدا ئه‌نجام بده‌ن. نه‌بێته‌ هۆى بێزاركردنى هاووڵاتيان و له‌ هه‌موو پشێوى و يه‌كترشكاندن و ناوزڕاندنێك دوور بێت. به‌ هیچ شێوه‌یه‌ك له‌سه‌ر حيساب و له‌كه‌داركردنی كه‌سایه‌تيی كاندید‌، به‌تایبه‌تی كاندیدى ئافره‌ت نه‌بێت.

هه‌موو لايه‌ن و داموده‌زگا ئیداری و ئه‌منیيه‌كان و ميديا و كۆمه‌ڵگای مه‌ده‌نی، هاوكار بن بۆ سه‌ركه‌وتنی پرۆسه‌ی به‌ڕێوه‌بردنی بانگه‌شه‌ى هه‌ڵبژاردن له‌ چوارچێوه‌ى ياسادا. به‌ ته‌واوى ئازاد بێت و ده‌رفه‌تی یه‌كسان و وه‌ك يه‌ك بۆ هه‌موو لايه‌ن و كاندیده‌كان فه‌راهه‌م بێت.

هه‌موو حزب و لايه‌نه‌ سياسييه‌كان ده‌بێت ئه‌وه‌يان له‌بيربێت، كه‌ دوای هه‌ڵبژاردن هه‌موومان ئامانجمان ئه‌وه‌یه‌ له‌ به‌غدا پێكه‌وه‌ كاربكه‌ین بۆ پته‌وكردنى ديموكراسى، به‌رژه‌وه‌ندیيه‌كانی عێراق به‌گشتی و به‌ده‌ستهێنان و پاراستنی مافه‌ ده‌ستوورييه‌كانی هه‌رێمى كوردستان به‌تایبه‌تی. له‌ بانگه‌شه‌ى هه‌ڵبژاردندا ده‌بێت كارێكى وا نه‌كرێت هه‌ماهه‌نگی و هاريكارى و پێكه‌وه‌يى و كاری هاوبه‌شى داهاتوو له‌ به‌غدا سه‌ختتر بكات.

ده‌نگدان ماف و ئه‌رك و به‌رپرسياريه‌تييه‌، ده‌بێ په‌يامى هه‌موومان ئه‌وه‌ بێت كه‌ هاووڵاتييان ئه‌و مافه‌يان به‌كاربهێنن، ئه‌رك و به‌رپرسياريه‌تى هه‌ڵبگرن و به‌ به‌شداريى كارايان له ده‌نگداندا، هه‌مووان پێكه‌وه‌ له‌ گۆڕانگارى و هه‌وڵه‌كانى بنياتنانى داهاتوويه‌كى باشتردا به‌شدار بن. ئه‌م هه‌ڵبژاردنه‌ بۆ عێراقييه‌كان گرنگه‌، كۆمه‌ڵگه‌ى نێوده‌وڵه‌تيش به‌ بايه‌خه‌وه‌ لێى ده‌ڕوانێت، بۆيه‌ نه‌ته‌وه‌ يه‌كگرتووه‌كان و يه‌كێتيى ئه‌ورووپا تيمه‌كانيان ده‌نێرن و له‌ نزيكه‌وه‌ چاودێرى ده‌كه‌ن.

هيواى بانگه‌شه‌يه‌كى‌ سه‌ركه‌وتوو بۆ هه‌موو لايه‌ك و هه‌ڵبژاردنێكى پاك و بێگه‌رد ده‌خوازم، كه‌ جێى متمانه‌ى هه‌مووان بێت.

 

نێچيرڤان بارزانى

سه‌رۆكى هه‌رێمى كوردستان

2021/9/10