"رێکخراوی قاعیدە چالاک دەبێتەوە"

هۆشداری لە چالاکبوونەوەی رێکخراوی قاعیدە دەدرێت
ژمارەیەک چەکداری قاعیدە - ئەرشیف
ژمارەیەک چەکداری قاعیدە - ئەرشیف

K24 - هەولێر

سەرۆکی ئاژانسی هەواڵگری ناوەندی ئەمەریکا هۆشداری لە چالاکبوونەوەی رێکخراوی قاعیدە لە ئەفغانستان دەدات.

داڤید کوهین، جێگری سەرۆکی ئاژانسی هەواڵگری ناوەندی ئەمەریکا (سی ئای ئەی) رایگەیاند "واشنتن چەندین ئاماژەی بۆ سەرلەنوێ خۆڕێکخستنەوەی رێکخراوی قاعیدە دەست کەوتووە، لە ماوەی دوو ساڵی داهاتوودا چالاک دەبێتەوە".

ئەمەش لە کاتێکدایە دوێنێ 14/9/2021، ئافریل هاینز بەڕێوەبەری دەزگای هەواڵگری نیشتمانی ئەمەریکا لە لێدوانێکی رۆژنامەوانیدا رایگەیاند، سەرچاوەی مەترسییەکانی تیرۆر بۆ سەر وڵاتەکەی، لە ئەفغانستانەوە نییە، بەڵکو لە عێراق، سووریا، یەمەن و سۆماڵەوەیە.

قاعیدە یەکێکە لە رێکخراوە توندڕەوەکان لە ساڵی 1988 لەلایەن ئوسامە بن لادن لە ئەفغانستان دامەزراوە، دواتر پەلی هاویشتووە بۆ چەند وڵاتێکی دیکە، دوای ئەنجامدانی کردەوەی تیرۆرستی 11 سێپتێمبەر، ئەمەریکا هەوڵەکانی بۆ لەناوبردنی قاعیدە چڕکردەوە، بە کوژرانی ئوسامە بن لادن، توانی ئەو رێکخراوە لە چالاکی بخات.