پێشانگای شێوەکاری "پانۆرامای خۆڕاگری کورد" کرایەوە
K24 – هەولێر
پێشانگای شێوەکاری "پانۆرامای خۆڕاگری کورد" لە هەولێر کرایەوە، تابلۆکانی پێشانگاکە گوزارشتن لە مێژووی خەبات و خۆڕاگری گەلی کورد.
پێشنیوەڕۆی ئەمڕۆ سێشەممە 21/9/2021، بە چاودێری و ئامادەبوونی د. سالار عوسمان بریکای وەزارەتی رۆشنبیری و لاوانی حکومەتی هەرێمی کوردستان، پێشانگای پانۆرامای خۆڕاگری کورد بۆ هونەرمەندی شێوەکار" کەمال هەژار"ـی لە هۆڵی پێشەوا لە هەولێر کرایەوە.
لەم پێشانگایەدا شێوەکار خۆڕاگری و کۆڵنەدان و خەباتی گەلی کوردی لە رێگەی تابلۆکانی پیشانداوە، لەگەڵ هەموو ئەو زوڵم و ستەمەی لە نەتەوەی کورد کراوە، وەکخۆی باسیکردووە لە رێی پانۆرامایەکی شێوەکارییەوە، تا دەگاتە دروستکردنی پۆڕترێتیی کەسایەتییەکان و سەرکردەکانی کورد و رۆڵی ئافرەتانی کورد لە بزاڤی رزگاریخوازی گەلی کوردا.
ناونیشانی تابلۆکانی پێکهاتبوو لە:.
بۆردوومانی قەڵادزێ، قەڵای شێروانە، شۆڕشی بەدرخانەکان، شەڕی بەردەرکی سەرا، بارزانی نەمر و پێشەوا قازی محەمەد، قەڵای هەولێر، مەرگەساتی هەڵەبجە، قەڵای دێرینی کەرکووک، ئەنفالی کورد لە کوردستان، شەڕی بەردەقارەمان، سمکۆی شکاک، شێخ مەحموودی حەفید.
