مه‌سرور بارزانی: دوای پێداچوونەوە و گۆڕانکاری دەست بە جێبەجێکردنی پرۆژه‌ی فڕۆكه‌خانه‌ی دهۆك دەکرێتەوە
K24 - دهۆك:
ئەمڕۆ سێشەممە 21ی ئەیلوولی 2021 مەسرور بارزانی سەرۆکی حکومەتی هەرێمی کوردستان، سەردانی پڕۆژەی دروستکردنی فڕۆکەخانەی نێودەوڵەتیی دهۆکی کرد.
سەرۆکی حکومەت لە نزیکەوە شوێنی پڕۆژەکە و نەخشە و هەنگاوەکانی جێبەجێکردنی پڕۆژەکەی بەسەر کردەوە کە پڕۆژەیەکی ستراتیجییە و ئاسانکارییەکی زۆر بۆ گەشتکردنی هاووڵاتییانی پارێزگای دهۆک و بەستنەوەی بە پارێزگاکانی دیکەی هەرێم و عێراق و ئالوگۆڕی بازرگانی نێوان هەرێمی کوردستان و دەرەوە دەکات.
سەرۆکی حکومەت لە وتەیەکدا ئاماژەی بەوەدا کە دوای پێداچوونەوە و ئەنجامدانی گۆڕانکاری پێویست، دەست بە جێبەجێکردنی پڕۆژەکە دەکرێتەوە.
ئەمەش دەقی وتەکانی سەرۆکی حکومەتی هەرێمی کوردستانە:
بەناوی خودای گەورە و میهرەبان
هاتووینەتە ئێرە بۆ سەردانی فڕۆکەخانەی دهۆک لە قەزای سێمێل، کە لە کابینەکانی پێشتر بڕیار درابوو ئەم فڕۆکەخانەیە دروست بکرێت و بڕێک بودجەشی بۆ تەرخانکرابوو، کارێکی کەمیشی لەسەر کراوە، بەڵام بەداخەوە لەبەر قەیرانی ئابووری نەتوانرا تەواو بکرێت.
سەردانی ئێمە ئەمڕۆ بۆ ئەوەیە، پێداچوونەوەیەک بەم پڕۆژەیە و بەو گرێبەستانەی کراون بکەین، تا جارێکی دیکە دەست بکەینەوە بە دروستکردنی ئەم فڕۆکەخانەیە، کە گرنگە بۆ دهۆک و دەورووبەریش.
ئەگەر خودا هاوکار بێت دوای دیراسەکردنێکی جددی کە دەستی پێکردووە، پڕۆژەکە ئامادە دەکەین، تا ئەم فرۆکەخانەیە بە زووترین کات دەست بەکاربێت و بنیات بنرێت.
بۆیە حەزمکرد، هەموو هاووڵاتییانی کوردستان و بە تایبەت دانیشتووانی دهۆک ئاگادار بکەمەوە، ئەگەر خودا هاوکار بێت، دەست بە ئاوەدانکردنەوەی ئەم فڕۆکەخانەیە دەکەین، کە پێداچوونەوە سەرەتاییەکان، بەرەو کۆتایی چوون و ڕەنگە هەندێک گۆڕانکاریشی تێدا بکرێت، بەڵام هەرکات ئامادە بوو، دواتر موژدەی دەستپێکردنی ئەم پڕۆژەیەتان لە ماوەیەکی نزیکدا پێ دەدەین.
هەر سەرکەوتووبن.
