پزیشكێكی كورد به‌ باشترین پزیشكی ویلایه‌تی لۆیزیانای ئه‌مه‌ریكا هه‌ڵبژێردرا

پرۆفیسۆر "غازی زێباری" به‌ باشترین پزیشكی ویلایه‌تی "لۆیزیانا"ی ئه‌مه‌ریكا دیاریكرا
پرۆفیسۆر "غازی زێباری" به‌ باشترین پزیشكی ئه‌مه‌ریكا دیاریكرا
پرۆفیسۆر "غازی زێباری" به‌ باشترین پزیشكی ئه‌مه‌ریكا دیاریكرا

K24 - هه‌ولێر:

پرۆفیسۆر "غازی زێباری" له‌ ویلایه‌تی "لۆیزیانا"ی ئه‌مه‌ریكا له‌لایه‌ن گۆڤاری "Louisiana Life Magazine" به‌ هاوكاری كۆمپانیای " Castle Connolly" بۆ ساڵی 2021 به‌ باشترین پزیشكی ئه‌و ویلایه‌ته‌ هه‌ڵبژێدرا.

گۆڤاره‌كه‌ له‌سه‌ر بنه‌مای ده‌نگدانی پزیشكان پرۆفیسۆر "غازی زێباری"یان وه‌ك باشترین پزیشك بۆ ئه‌مساڵ له‌و ویلایه‌ته‌ هه‌ڵبژاردووه‌، كه‌ به‌ بۆچوونی ئه‌وان به‌ شێوه‌یه‌كی زانستی و پیشه‌ییانه‌ كار ده‌كات.

جەگەر جاسم، پرۆفیسۆری یاریدەدەر لە زانکۆی کۆلۆرادۆ و دەرچووی زانکۆی جۆن هۆپکینز، له‌گه‌ڵ پرۆفیسۆر "غازی زێباری" كاری كردووه‌، له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی فه‌یسبووك نووسیویه‌تی: "وه‌ك كوردێك، كۆچبه‌رێك و پزیشكێك پرۆفیسۆر "غازی زێباری" به‌ جێگای شانازی ده‌بینم، هه‌میشه‌ خۆمان به‌ قوتابی ئه‌و ده‌زانین".

ئاماژه‌ی به‌وه‌ش كرد، چیرۆكی سه‌ركه‌وتنی پرۆفیسۆر "غازی زێباری" مایه‌ی ئه‌وه‌یه‌ ببێته‌ هانده‌رێك بۆ میلله‌ته‌كه‌مان كه‌ له‌سه‌ر ئاستی نێوده‌وڵه‌تی ئاڵای زانست هه‌ڵبگرن و به‌رده‌وامی به‌ خه‌باتی زانستی و مرۆڤایه‌تی بده‌ن.

پرۆفیسۆر "غازی زێباری"، سه‌رۆكی به‌شی نه‌شته‌رگه‌ری و به‌ڕێوه‌به‌ری به‌رنامه‌ی پزیشكانی خولاوی نه‌شته‌رگه‌رییه‌ له‌ "WKHS"، له‌ هه‌مانكاتدا به‌ڕێوه‌به‌ری ناوه‌ندی "John C. McDonald" یه‌.