په‌تايه‌ك له‌ناو منداڵان له شاری سلێمانى بڵاوبووه‌ته‌وه
K24 - سلێمانی:
په‌تايه‌ك له نێو منداڵ و قوتابيان له شاری سلێمانى بڵاوبووه‌ته‌وه، كوردستان24 به‌دوادچوونى له‌سه‌ر په‌تاكه و چۆنيه‌تى بڵاوبوونه‌وه‌ى كردووه، به‌ڕێوبه‌رى نه‌خۆشخانه‌ى منداڵانى سلێمانى ده‌ڵێت په‌ته‌كه مه‌ترسيدار نيیه و پێويست بە دڵەڕاوكێ ناكات و دۆخەكە لە ژێر كۆنترۆڵدایە.
بەشێک لە منداڵان تووشی جۆرە پەتایەك بوون، کە نیشانەکانیان بریتین لە تا، کۆکە، هەڵامەت، سکچوون، رشانەوە، ئازاری سک و سەرئێشە، هەندێک لە منداڵەکان نیشانەکانیان سووکن و بەشێکی دیکەشیان بە توندی تووشی په‌تاكه بوون، بە گوێرەی نیشانەکان و ئەو شیکارییە تاقیگەییانەی کە بۆیان دەکرێت، دەرکەوتووە بەشێکیان تووشبووی کۆڕۆنا بوون، بەشێکی دیکەشیان جۆرێکن لە پەتای هەڵامەتی ئاسایین، زۆربه‌ى توشبووانيش قوتابين.
د. پشدەر عەبدوڵڵا، بەڕێوەبەری نەخۆشخانەی د.جه‌مال ئه‌حمه‌د ره‌شید-ی مندڵان ده‌ڵێت دۆخه‌كه له‌ژێر كۆنترۆڵدايه و پێويسته به‌ريه‌كه‌وتنى منداڵان به تايبه‌ت له خوێندنگاكان كه‌مبكرێته‌وه.
له‌قوتابخانه‌كانى سلێمانى رێكارى ته‌ندروستى گيراونه‌ته‌به‌ر بۆ رێگرتن له بڵاوبوونه‌وه‌ى په‌تا وه‌رزييه‌كه‌ى نێو منداڵان، هه‌ر قوتابییه‌ك نيشانه‌ى په‌تاى وه‌رزى و كۆرۆناى تێدا ده‌ربكه‌وێت، راسته‌وخۆ ره‌وانه‌ى پشكنين ده‌كرێت.
ئاريان به‌كر، كه به‌ڕێوبه‌رى قوتابخانه‌یه‌كی سلێمانییه و گوتی: "قوتابیانمان ئاگاداركردووه‌ته‌وه ماسك ببه‌ستن و كه‌متر له‌یه‌ك نزیك ببنه‌وه، له‌گه‌ڵ ئه‌وه‌ش توێژه‌ری كۆمه‌ڵایه‌تی و مامۆستایان رێنمایی قوتابیان ده‌كه‌ن".
له سلێمانى توانای نەخۆشخانەى منداڵان لەڕووی ژمارەی قه‌ره‌وێڵه و ئامێری پێویست و دەرمان و تاقیگەوە بێكێشه‌يه و ده‌توانن سه‌رجه‌م حاڵه‌ته‌كان چاره‌سه‌ر بكه‌ن، قوتابخانه‌كانى سلێمانيش زۆربه‌يان رێنماييه‌كانى خۆپاراستنيان له‌په‌تاى وه‌رزى و كۆرۆناش وه‌رگرتووه.
د.ی
