داوا لە بایدن دەکرێت دژی ئەردۆغان بێتە دەنگ

"بایدن سنوورێک بۆ پێشێلکارییەکانی ئەردۆغان دابنێت"
رەجەب تەیب ئەردۆغان سەرۆك كۆماری توركیا - جۆو بایدن سەرۆکی ئەمەریکا - ئەرشیف
رەجەب تەیب ئەردۆغان سەرۆك كۆماری توركیا - جۆو بایدن سەرۆکی ئەمەریکا - ئەرشیف

K24 - هەولێر

10 سیناتۆری ئەمەریکا داوا لە بایدن دەکەن، پێشێلکارییەکانی سەرۆک کۆماری تورکیا بەرامبەر کورد بە توندی سەرکۆنە بکات و سنوورێکی بۆ دابنێت.

10 سیناتۆری کۆماری و دیموکرات، لە ئەنجومەنی نوێنەرانی  ئەمەریکا، نامەیەکیان بۆ جۆو بایدن، سەرۆکی ئەمەریکا ناردووە دەربارەی پێشێلکردنی مافەکانی کورد لەلایەن ئەردۆغانەوە. نامەکە بە سەرپەرشتی سیناتۆر کریس ڤان هۆلن لە دیموکراتەکان و جەیمس لانکفۆرد لە کۆمارییەکان ئاراستەی بایدن کراوە.

لە نامەکەدا ئاماژە بەوە کراوە، هەدەپە سێیەم پارتی تورکیایە و ئێستا دەسەڵات لە هەوڵی داخستنیدایە، داوا لە بایدن دەکەن لەوبارەوە ئەردۆغان ئاگادار بکرێتەوە و ئەگەر هەدەپە دابخرێت و فشارەکانی سەر کورد بەردەوام بن، دەرەنجامی زۆر خراپی دەبێت.

داواش دەکەن فشار بخرێتە سەر تورکیا، بۆ جێبەجێکردنی بڕیارەکانی دادگای مافەکانی مرۆڤی ئەوروپا و ئازادکردنی سەڵاحەدین دەمیرتاش، هاوسەرۆکی پێشووتری هەدەپە.