ته‌قینه‌وه‌یه‌ك له‌ ناو مزگه‌وتێكی ئه‌فغانستان روویدا

به‌ ڤیدیۆ.. دیمه‌نی ناو مزگه‌وته‌كه‌ ببینه‌... راسته‌وخۆ دوای كۆتاییهاتنی نوێژی هه‌ینی روویداوه‌
دیمه‌نێك له‌ دوای ته‌قینه‌وه‌كه‌ی ناو مزگه‌وتی سه‌عدئاباد - تۆڕه‌ كۆمه‌ڵایه‌تییه‌كان
دیمه‌نێك له‌ دوای ته‌قینه‌وه‌كه‌ی ناو مزگه‌وتی سه‌عدئاباد - تۆڕه‌ كۆمه‌ڵایه‌تییه‌كان

K24 - هه‌ولێر:

سه‌رچاوه‌ میدیاییه‌كانی ئه‌فغانستان بڵاویانكرده‌وه‌، ته‌قینه‌وه‌یه‌كی به‌هێز له‌كاتی نوێژی هه‌ینی له‌ناو مزگه‌وتی "سه‌عید ئاباد"ی شاری "خان ئاباد"ی ویلایه‌تی قه‌ندوزی و باكووری ئه‌فغانستان روویدا.

به‌ گوێره‌ی راپۆرته‌ میدیاییه‌كانی ئه‌و وڵاته‌ كه‌ له‌ زاری شایه‌تحاڵان بڵاویانكردووه‌ته‌وه‌، به‌هۆی ته‌قینه‌وه‌كه‌ زیاتر له‌ 15 كه‌س له‌ناو مزگه‌وته‌كه‌ گیانیان له‌ ده‌ستداوه‌ و پتر له‌ 90 كه‌سیش برینداربوونه‌، پێشبینیش ده‌كرێت ئاماری قوربانیان به‌رزتر بێته‌وه‌.

به‌رپرسانی شاره‌كه‌ی، كه‌ ئێستا له‌ ژێر كۆنتڕۆڵی تاڵیبانه‌ باس له‌وه‌ ده‌كه‌ن، ته‌قینه‌وه‌كه‌ له‌ رێگه‌ی دانانه‌وه‌ی بۆمبی چێنراو بووه‌ و راسته‌وخۆ دوای كۆتاییهاتنی نوێژی به‌ كۆمه‌ڵی هه‌ینی روویداوه‌.

به‌ گوێره‌ی ئه‌و دیمه‌نانه‌ی له‌ تۆڕه‌ كۆمه‌ڵایه‌تییه‌كانی ئه‌و وڵاته‌ بڵاوكراونه‌ته‌وه‌، ته‌رمی نوێژخوێنان له‌ ناو مزگه‌وته‌كه‌ كه‌وتووه‌ و خه‌ڵك ته‌رمی قوربانیان و بریندارانی ناو مزگه‌وته‌كه‌ ده‌گوازنه‌وه‌.