چه‌ك سیسته‌می سیاسی ناپارێزێت

عەبدولحوسەین عەبتان
عەبدولحوسەین عەبتان، سەرۆکی فراکسیۆنی ئیقتیدار وەتەن
عەبدولحوسەین عەبتان، سەرۆکی فراکسیۆنی ئیقتیدار وەتەن

K24 - هه‌ولێر:

عەبدولحوسەین عەبتان، وەزیری پێشووتر و سەرۆکی فراکسیۆنی ئیقتیدار وەتەن له‌ هه‌ڤپه‌یڤینێكی كوردستان24 رایگه‌یاند، بوونی هەر سەربازێکی بیانی لە عێراق، دەبێتە هۆکاری نا سەقامگیری و رێگری لە گەشەپێدان و بونیادنان دەکات، هەندێک کەس و لایەن دەیانەوێت ئەمە بۆ مەبەستێکی دیکە بقۆزنەوە.

ده‌قی هه‌ڤپه‌یڤینه‌كه‌ی كوردستان24 له‌گه‌ڵ عەبدولحوسەین عەبتان:

بەڕێز عەبدولحوسەین سڵاوت لێبێت، وەزیری پێشووتر و سەرۆکی فراکسیۆنی ئیقتیدار وەتەن، سوپاس بۆ ئەم ده‌رفەتە و ئەم چاوپێکەوتنەکە.

عەبدولحوسەین عەبتان: بەخێربێن و جێگەی خۆشحاڵیمە.

با بەم پرسیارە دەست پێبکەین، ئێوە ئەندامی ئەنجومەنی باڵای ئیسلامی بوون، جیابوونەوە و فراکسیۆنی ئیقتیدار وەتەنتان پێکهێنا، ئایا هۆکارەکەی چی بوو، ئایا دەموچاوە کۆنەکان شێوازی فەرمانڕەوایەتی ئەوان ئێستا جێگەی قبوڵ کردن نییە، دەتانەوێت گۆڕانکاری بکەن؟

عەبدولحوسەین عەبتان: زۆر سوپاس بۆ بینەرانتان بە تایبەت هەرێمی کوردستانی خۆشەویست، بە دڵنیاییەوە وەک ئاگادارن جووڵەی سیاسی و کارکردن لە شوێنە جیاوازەکان، هەروەها قه‌یرانی دوای 2003 تا ئێستا، هەموو لایەنە سیاسییەکان ئەزموونی جیاجیان بینی، هەندێکجار ئەزموونی سەرکەوتووبوون، لەهەندێکیشیاندا شکست خواردوو بوون، هەر یەکێک لە ئێمە بیروڕای تایبەتی خۆی هەیە، لە ژوورە داخراوەکان دەخرانەڕوو، لەبارەی ئیدارەدانی وڵات و تێپەڕاندنی قەیرانەکان و پەیوەندییە سیاسییەکان و گەشەپێدان و هەموو شتێک، هەندێکجار خۆت لەبەردەم واقیعێکی دیاریکراو دەبینییەوە، نەدەتوانی لە کاروانەکەدا بەردەوام بیت، بڕوات بە روانینەکان نەبوو، بۆیە دەبووایه‌ یان بمێنیتەوە و دژایەتی بکەیت، یان بمێنیتەوە و رای خۆت نەبێت، یان رێگایەکی دیکە بگریتەبەر و روانینی خۆت بۆ داهاتوو بخەیتەڕوو، ئەمە ئەوەبوو کە من گرتمەبەر، ئیقتیدار وەتەنم پێکهێنا، لەگەڵ کۆمەڵێک کەسایەتی شارەزا و گەنجان ئەوانەی لە ئەزموونەکانی رابردوودا لەگەڵمان بوون، نەوەک تەنیا لە وەزارەتی وەرزش و لاوان، بەڵکو لە پارێزگای نەجەفیشەوە کاتێک من جێگری پارێزگاربووم، دیدگابینی خۆمان بۆ ئیدارەدانی دەوڵەت هەیە، هەروەها لەبارەی ئەوەی گەل و وڵات چی پێویستە، بە تایبەت لەم قۆناخە، کە بە قۆناخێکی هەستیار دادەنرێت، گەلی عێراق بەدەست چەندین کێشەوە دەناڵێنێت، کە دەڵێم گەلی عێراق مەبەست هەر لە باکوور تا باشوورە، لە زاخۆ تا فاو، بۆیە پێویستیمان بە رێگەی نوێ هەیە، بۆ مامەڵەکردن لەگەڵ ئەم قەیرانانە.

باشە نەوەی کۆن رێگەتان پێدەدات، رێگەی گۆڕانکاری بە نەوەی نوێ دەدات؟

عەبدولحوسەین عەبتان: لەگەڵ رێزم بۆ هەمووان، کاری سیاسی ئەوە نییە رێگە بدەیت و نەدەیت، لەوانەیە گەل بڕیار لەمە بدات، یان سندوقەکانی دەنگدان، ئەمە یەک، دوو، بەگوێرەی زانیاری تایبەت و وردی من، هەموو ئەوانەی کۆن، یان سیاسییەکانی پێشوو، گەیشتوونەتە ئەو بڕوایەی بەمشێوەیە و بە شێوازی کۆن ئیدارەدانی وڵات ناکرێت، لەوانەیە سیستمی سیاسی بپارێزرێت بۆ قۆناخی داهاتوو، لەوانەیە تا خولی داهاتوو، ئەمە بە رای من، هەندێکییان دەڵێن نا تا ماوەیەکی زیاتریش دەتوانین پارێزگاری لێبکەین، خەڵک هەر برسی بێت، کێشەی ئەمنی و خزمەتگوزای هەبێت، گەندەڵی بەربڵاو و چەندین قەیرانی دیکە هەبێت، بە دڵناییەوە سیستمی سیاسی بەردەوام نابێت، تێبینی بکە پێش دوو ساڵ چی لەبەغدا و زۆربەی پارێزگاکان روویدا، لە سەرهەڵدانی خۆپیشاندان، کە هەندێک بە ئاژاوەگێڕی ناویان برد، منیش بەدووری نازانم دەست لەپشتدان هەبوونێت، بەڵام زۆرینەی ئەو گەنجانەی خۆپیشاندانیان کرد، داوای ژیانێکی شکۆمەندانە و وڵاتێکی پێشکەوتوویان دەکرد، کاتێک گوێیان بۆ نەگیرا و قەیرانەکان بەردەوام بوون، خەڵک هاتە سەر شەقام، ئێستا خەڵک چاودێری دەکات، بزانێت دوای هەڵبژاردن چی روودەدات، ئەگەر دیمەنێکی سیاسی و حکومەتێکی بەهێز و راستگۆ ببینن، کە مرۆییانە مامەڵە دەکات و سەرکەوتووبێت لە چارەسەرکردنی قەیرانەکان، لەوانەیە ئەمە سیستمی سیاسی بپارێزێت و ماوەکەی درێژ بێت، بەڵام ئەگەر حاڵەتەکە هەر بەمشێوەیە بێت، بەرای من ئەستەمە ئەم سیستمە بەردەوام بێت، بابەتە ئەوە نییە، رێگە دەدەن یان نا، گەل رێگە بەهیچییان نادات بەردەوام بن.

ببورە بەڕێز عەبدولحوسەین، بەڵام نەوەی کۆن، چەک و پارەیان بەدەستەوەیە، با بڵێین میلیشیایان هەیە و ئێوە نیتانە.

عەبدولحوسەین عەبتان: نیمە، من گەلم لە پشتە.

مەبەستم هەر ئێوە نییە..

عەبدولحوسەین عەبتان: بەڵێ روونە، بەڵام تەمەنی چەک و میدیای وەک دەوترێت زوڕناژەن، بەڵێنە درۆینەکان، تەنانەت چەکیش نەیانتوانیووە سیستمە سیاسییەکان بپارێزێت، هەرچەند دیکتاتۆرییش بووبن، بەڕێزت دەزانیت بە درێژایی مێژوو جیهان چەندین دیکتاتۆری بەخۆوە بینی، بەڵام بەردەوام نەبوون، ئەو رژێمانەی دەیانەوێت بەردەوام بن، دەبێت لەلایەن گەلەکانیانەوە پشتیوانی بکرێن، گەلانیش کەی پشتیوانی لە سیستمە سیاسییەکان دەکەن، کاتێک رێزلێگیراو بێت و داواکارییەکانی جێبەجێ بکرێن، هەست بکات وڵاتەکەی لە گەشەکردن و پێشکەوتندایە، لەم حاڵەتەدا گەل پارێزگاری لە سیستمی سیاسی دەکات، بەڵام چەک، با بگەڕێینەوە بۆ سەدام حوسێن، 3 ملیۆن سەرباز، دامەزراوەی داپڵۆسێنەری ئەمنی جیاجیا، جەیشی قودس و شەعبی، هەواڵگری و ئاسایش، ئەمنی تایبەتی، بەڵام ئەنجامەکەی چی بوو.

بە رای بەڕێزت ئیقتیدار وەتەن چەند کورسی بەدەست ده‌هێنێت؟

عەبدولحوسەین عەبتان: ئێستا با نوکتەیەکی سادەت بۆ باسکەم، یەکێک لە هاوڕێکانم دەڵێت، کاتێک لەگەڵ سەرۆک فراکسیۆنەکان قسە دەکەم و پێیان دەڵێم چەند کورسی بەدەست ده‌هێنن و دۆخی ئێوە دوای هەڵبژاردن چۆن دەبێت، کاتێک ژمارەکان کۆدەکەمەوە، ژمارەی کورسییەکانی پەرلەمان دەگاتە هەزار، نەوەک 329 کورسی.

لە راستیدا نامەوێت ژمارە بخەمە روو، بەڵام دەتوانم بڵێم ئێمە لە دۆخێکی باشداین، رکابەری بەهێزین، لە چەندین بازنەدا، نەوەک تەنیا لە بەغدا و باشوور، تەنانەت لە پارێزگاکانی دیکەش، لە موسڵ باشین هەرچەندە کاندیدمان کەمە، بەڵام سوپاس بۆ خوا لە پێگەی رکابەریداین، لە سەڵاحەدین و دیالە و هەروەها بەغداش، جا با باسی ژمارە نەکەم، درووستیش نییە باسی بکەم، بەڵام لەو بڕوایەدام موفاجەئە دەبێت لە هەڵبژاردنی داهاتوو.

بەڕێز عەبدولحوسەین ئایا فراکسیۆنە گەورەکان بە ئەنجامی هەڵبژاردن رازی دەبن، قبوڵی دەکەن، فراکسیۆنە بچووکەکان وەک ئێوە سەربکەون، ئەگەر قبوڵی نەکەن چی روودەدات؟

عەبدولحوسەین عەبتان: نا قبوڵی دەکەن دۆخی عێراق بەشێوەیەکە.

با راستگۆ بم لەگەڵت، رەوتی سەدر هەر لەئێستاوە دەڵێت، سەرۆکایەتی وەزیران بۆ ئێمەیە، عامری و مالیکیش هەر وادەڵێن، چی دەڵێی لەمبارەیەوە؟

عەبدولحوسەین عەبتان: نا من ناوی دەنێم جۆشدانی هەڵبژاردن، با تێکەڵی هەڵوێستی سیاسی نەکەین، ئەمڕۆ لایەنی سیاسی گەورەکان شارەزان و ئەم وردەکارییانە دەزانن، لایەنە سیاسییەکان تەنانەت کەسانی سەربەخۆش، کاتێک دەچنە هەڵبژاردنەوە، روانینی خۆیان بۆ ئیدارەدانی وڵات هەیە لە قۆناخی داهاتوودا، هەروەها پەیامی ئەرێنی بۆ دەرەوە و ناوەخۆ دەدات، بەتایبەت بۆ ناوخۆی وڵات و گەلەکەی، ئێ چی بڵێت خۆ ناڵێت دەبینە ئۆپۆزسیۆن، بە دڵنیاییەوە دەڵێن، بەشداری حکومەت دەبین و لە لوتکەی حکومەتیشەوە دەبین، ئەمە شتێکی ئاساییە، تاوەکو پێگەی خۆی بۆ هەڵبژاردن بەهێز بکات، دواتر هەمووان دەڵێن، کاری ئێمە دەکەوێتە سەر ئاستی قەبارەی حزبەکەمان، بەڵام ئەوە دەڵێن کە فڵانە کەس گونجاوە بۆ سەرۆکایەتی حکومەت، ئەمە هەڵە نییە، کاریگەریشی بەسەر دوای هەڵبژاردنەوە نابێت، لەوانەیە هەندێک لایەن هەبن، زیاتر شارەزای هەڵبژاردن بن و دەنگی زیاتر بەدەست بێنن، بەڵام پۆستی سەرۆک وەزیرانییان پێنەدرێت و ببنە ئۆپۆزسیۆن، وەک لە رابردوودا روویداوە، یان لەوانەیە وەزارەت و دەستە و پۆستی دیکە وەربگرن، بۆیە بەرای من جارێ زووە باسی ئەم بابەتە بکەین، هەمووان ئێستا چاوەڕێن بزانن چی لەم هەڵبژاردنە دەکەوێتەوە، ئەم هەڵبژاردنە جیاوازە لەوانەی پێشوو، ئێمە 5 یان 4 هەڵبژاردنمان کردووە، بەڵام بە رای من ئەمەیان جیاوازی زۆری هەیە، بە دڵنیاییشەوە، ئەنجامەکانیشی چاوەڕواننەکراو دەبن، لێشت ناشارمەوە زۆربەی فراکسیۆنە گەورەکان چاوەڕێی لەدایکبووی نوێ دەکەن، چاوەڕێن بزانن دوای هەڵبژاردن، چی بەسەر فراکسیۆنە گەورە و بچووکەکاندا دێت.

بەڕێز عەبدولحوسەین، بەرای تۆ تێڕوانینی لایەنە شیعەکان بۆ پەرلەمان و حکومەت گۆڕاوە، نەوەی کۆن دەڵێم؟

عەبدولحوسەین عەبتان: ئەوەی من لێی دڵنیام، لایەنە سیاسییەکان، گەیشتوونەتە ئەو بڕوایەی دەبێت لە قۆناخی داهاتوودا حکومەتێکی بەهێز هەبێت، بتوانێت.

چۆن؟

عەبدولحوسەین عەبتان: من دوو شتم پێشتر گوت، ئەگەر سەرنجت دابێت، گوتم دەبێت حکومەتێكی مرۆییانەی راستەقینە بێت، واتا بە گیانێکی مرۆییانەی بەرز مامەمەڵە لەگەڵ گەل بکات، هەروەها لەگەڵ هەموو دۆسییەکان و رووداوەکان راستگۆش بێت، درۆ نەکات، بەڵێنی درۆینە نەدات، لە رێگەی فەیسبووک و میدیای زوڕناژەن و بەیاننامەی بۆشەوە خەڵک هەڵنەخەڵەتێنێت، بە مانای وشە راستگۆ بێت، هەروەها دەستوبرد بکات لە کارەکان، ئەزموونی هەبێت لە چارەسەرکردنی قەیرانەکان، عێراق لەم قەیرانانە رزگار بکات، دەبێت لە سەرجەم بوارەکاندا وەڵامدەرەوەی داخوازییەکانی گەلی عێراق بێت و چارەسەری کێشەکانی بکات، ئەگەر حکومەتێکی ئاوامان هەبوو، بە دڵنیاییەوە، یان با بگەڕێینەوە سەر پرسیارەکەت، زۆرێک لەو بڕوایەدان، بە سیاسییە کۆنەکانیشەوە، پێویستە ئەنجامی هەڵبژاردنەکان، جا بەهەر شێوەیەک بێت، پێویستە حکومەتێکی بەهێز، راستگۆ، خزمەتگوزار و مرۆییانە بێتە کایەوە، بۆ جێگیرکردنی سیستمی سیاسی، ئەگەرنا تووشی کێشەی گەورە دەبینەوە.

بە رای تۆ باشترین رێگە بۆ مامەڵەکردن لەگەڵ هەرێم کامەیە؟ یان گونجاوترین پەیوەندی نێوان هەرێم و بەغدا چیە؟ بۆ چارەسەرکردنی کێشەکانی نێوان بەغدا و هەرێم؟

عەبدولحوسەین عەبتان: هەندێک پرەنسیپی جێگیر لە عێراق هەن، پێویستە هەمووان رێزی لێبگرن، بە رای من ئەمڕۆ زۆربەی سیاسییەکان، بەتایبەت ئەوانەی ئێستا لە دەستەڵاتن، جا چ ئەوانەی کوردستان یان بەغدا، دەستوورێك هەیە و رێزلێگیراوە، سەرەڕای بوونی چەند تێبینییەک، کە دوای پەسندکردنی دەستوور دەرکەوتن و بە پێویست زانرا هەموار بکرێتەوە، هەندێک لە بڕگەکان، لەگەڵ ئەوەشدا هەمووان دەڵێن دەبێت رێز لە دەستور بگیرێت، لەلایەکی دیکەوە چەند یاسایەک هەیە، کە یاسای فیدڕاڵین، دەبێت لەلایەن هەمووانەوە رێزییان لێبگیرێت، بە عەرەب و کورد و هەموو ئەوانەی دیکە، هەروەها ئارامی لە مامەڵەکردن لەگەڵ یەکتر، کەمێک پێش ئێستا گوتم، راستگۆیی و مرۆییانە، بە ئارامی مامەڵەکردن لەگەڵ دۆسییەکان، جیاوازی لە نێوان حکومەتی هەرێمی کوردستان و حکومەتی فیدڕاڵی نییە، هەندێک سامان هەیە لە وڵات، پێویستی بە شەڕ و کوشتن نییە، بەمشێوەیە کۆتایی نایەت، دەبێتە هۆکاری دەستێوەردانی دەرەکیش، خۆمان وەک عێراقی لاواز دەکەین، دەبێت ئەمە بە ئەقڵ و ئارامی و لە ژێر چەتری دەستوور و یاساکان چارەسەری کێشەکانمان بکەین، ئەمڕۆ نەبێ سبەی، بەڵی من لەگەڵ کۆتاییەکی ئاڵۆز نیم، دەبێت چارەسەر بدۆزرێتەوە، ئەمەش لە رێگەی بەردەوامیدان بە گفتوگۆی هێمن و ئارام و روونەوە دەبێت و دواجار گەیشتن بە رێککەوتن و پابەندبوونی هەموو لایەک، خاڵی دووەم، بۆ تەنیا هەرێمی کوردستان کێشەی لەگەڵ بەغدا و حکومەتی فیدڕاڵی هەیە، بە نموونە حکومەتی خۆجێی بەسرە، کێشەی لەگەڵ حکومەتی فیدڕاڵی لە بەغدا نییە، ئەویش هەیەتی، کێشەکان بەردەوام زەق دەبنەوە، بە تایبەت لە بواری پڕۆژە خزمەتگوزارییەکان، سەرچاوە سروشتییەکان و پترۆدۆلار و چەندین کێشەی دیکە، جا چارەسەی ئەم کێشانە چیە و چۆن دەتوانرێت بگەینە ئەنجام و دەست بە بنیاتنانەوەی وڵات بکەین و گەل دڵخۆش بکەین، نابێت ئەمڕۆ هەرێمی کوردستان لە نەخشەی عێراق دەرکەین، یان بڵێین بەسرە لە نەخشەدا نیە، هەموو هاوڵاتییەک لەو ناوچانە عێراقین، راستە ئەمە کوردە، ئەمە تورکمانە، ئەمە سوننەیە ئەمە شیعە و ئەمە مەسیحییە، ئەمە شتێکی عەیبە و کەموکوڕی نییە، شتێکی باشە ئەمجۆرە فرەییەمان لە هەموو شتێک هەبێت، بەڵام لەژێر چەتری عێراق هەموومان یەکین، بۆیە رەوا و مەنتق نییە، پەنا ببەینە بەر یەکتر تۆمەتبارکردن و هەڕەشە و ئاڵۆزترکردن، بەڵکو دەبێت هەمیشە رێز لەدەستوور و یاساکان بگرین و پەنا بۆ مێزی گفتوگۆ ببەین.

بەڕێز عەبدولحوسەین، ئەمە پرسیاری من نییە، پرسیاری هاووڵاتییەکی کوردە، فەرمانبەرێک یان کرێکارێکی کوردە، ئایا لە داهاتووشدا بەشە بودجەی هەرێم دەبڕدرێت؟

عەبدولحوسەین عەبتان: نا من ناوی نانێم بڕین، من و تۆ لە پەرلەمان هاوڕێ بووین، با بگەڕێینەوە 12 ساڵ پێش ئێستا، لە 2010ەوە ئێمە بەیەکەوە بووین، بەڵام با بگەڕێینەوە بۆ 2006 و 2008 و تا ئەمڕۆ، 4 خولی پەرلەمانی، لە چەند بڕیار و پڕۆژە یاسای لەمجۆرە، کۆمەڵێک لە دژی کۆمەڵیکی دیکە دەنگییان داوە، جا بڕیاری چارەنووسساز، نەوەک بڕیاری دیکە، کە وەک خۆتان دەزانن هەندێک بڕیار هەن چارەنووسساز نین، لە وێنەی یاسای بودجە، نەوت و غاز، یاسای حەشدی شەعبی و ماددەی 140.

ناکۆکی لەبارەوە نەبوو، تەنیا 2 کەس، بەبیرمە لەکاتی پەسه‌ندکردنی بودجەی یەکێک لە ساڵەکان، لەوانەیە لە حکومەتەکەی عەبادی بووبێت، هەروەها یاسای حەشدی شەعبیش، برایانی کورد دەنگییان بۆ نەدا، ئێمە کاتێک باس لە بوارەکانی ناکۆکی نێوان هەرێمی کوردستان و حکومەتی فیدڕاڵی دەکەین، لەسەر سەدا 98 کۆکین و لەسەر سەدا 2 ناکۆکین، ئەمە لە هەموو کاروانی مێژوویی پێکەوەییمان، بۆیە ئەمە بەڵا نییە، دەکرێت بە هێمنی چارەسەر بکرێت، من دەگەڕێمەوە سەر ئەو قسەیەی پێشتر گوتم، راستگۆیی و مرۆییانە، ئەگەر ئەمانە هەبوون، متمانە دەگەڕێتەوە نێوانمان، لە رێگەی گفتوگۆشەوە دەگەینە چارەسەر بۆ کێشەکان، چونکە ناکرێت رۆڵەکانی یەک وڵات، بەبێ متمانەیی مامەڵە لەگەڵ یەکتر بکەن و بە زمانی شەڕ و بایکۆت کردن قسە بکەین، ئەمە چارەسەر نییە، ئەگەر باسی بودجە و مووچەی فەرمانبەرانی هەرێم بکەین، دەڵێم تەنیا یەکجار ئەمە روویداوە، لە 20 ساڵدا یەکجار بڕیاری بڕینی مووچە دراوە، راستە لە یاسای بودجەدا ماددەی جێ ناکۆک هەبووە، نەوەک لەسەر کۆی یاساکە، بەڵکو چەند ماددەیەک، ئەمەش شتێکی ئاساییە، من ئاگام لێیە برایان لە هەرێمی کوردستان، کە زۆربەیان هاوڕێمانن، هەمیشە دەڵێن پابەندین بە دەستوور و یاساکانەوە، جا کە دەستوور رۆژێک لە رۆژان رێگەی بە فراکسیۆنێک داوە، دژی پڕۆژە یاسایەک بووەستێتەوە، ئەمە کۆتایی دونیا نییە، دەبێت رێز لە بڕیارێک بگیرێت، کە بە زۆرینە تێدەپەڕێنرێت، لە رووی ئەخلاقییەوە ئەوە بووەتە باو، کە لە عێراق لەنێوان سەرجەم پێکهاتەکان، یەکتری پشتگوێ نەخەین، لە یاسا گرنگەکان، دادەنیشین و گفتوگۆ دەکەین، لەسەر شێوازێک رێکدەکەوین، کە مایەی رەزامەندی هەمووان بێت و دواتر دەنگی لەسەر بدەین.

بەڕێز عەبدولحوسەین پرسیارێک دەکەم، راشکاوانە وەڵامم بدەوە.

عەبدولحوسەین عەبتان: من هەمیشە راشکاوم.

جوانە .. پرسیارەکەم لەبارەی چوونە دەرەوەی هێزەکانی بیانییە لە عێراق، جا هێزەکانی ئەمه‌ریکا یان هاوپەیمانان بێت، باشە ئەی هێزەکانی تورکیا لە بە قوڵایی 15 بۆ 20 کیلۆمەتر هاتوونەتە ناو عێراقەوە، لەولاشەوە ئێران گوندەکانی سنوور بۆردوومان دەکات، هەندێکجاریش دێنە ناو هەرێمی کوردستان، کە بەشێکە عێراق، باشە، چارەسەر بۆ ئەمە چییە؟

عەبدولحوسەین عەبتان: وەڵامی ئەم پرسیارە چەند کاتژمێرێکی دەوێت، با پێشەکییەک بۆ وەڵامدانەوە باس بکەم، ئەگەر ئێمەی عێراقی بمانەوێت دژی هاتنی سوپای بیانی بۆ ناو وڵات بووەستینەوە، دەبێت گەلەکەمان دڵخۆش بکەین، دەبێت لە ناوخۆوە شکۆی وڵات بگێڕینەوە، ئەمەش لە رێگەی کاری باش و بەدەستهێنانی خۆشەویستی گەل، بە دڵخۆشکردن و پێشەکەشکردنی خزمەتگوزاری و ژیانێکی شایستە، بۆ ئەوەی حکومەت پاڵپشتییەکی ناوخۆیی هەبێت، کە ناوی گەلە، ئەمە بە پلەی یەکەم، بە پلەی دووەم، با لە ناوهێنان دووربکەومەوە، هێزەکانی ئەمه‌ریکا، هێزەکانی تورکیا، ئەم بابەتە، لێکدانەوەی زۆر هەڵدەگرێت، من نامەوێت لەو لایەنەوە وەڵام بدەمەوە، بە رای من، بوونی هەر سەربازێکی بیانی، نا سەقامگیری دروست دەکات، هەر سەربازێکی بیانی، تۆ دەزانیت، هەمیشە فێرکراوین کە کێشەکان وەک خۆی باس بکەین، نە زیاد و نە کەم، توێژینەوەکەت ورد بێت و ئەنجامەکەشی وەک دەگوترێت زۆر ورد بێت، جا با بە وردی باسی بکەم، هەر سەربازێکی بیانی لە هەر بستێکی خاکی عێراق، بەواتای ناڕازیبوونی چەند وڵاتێکی دراوسێ، یان وڵاتانی دیکە دێت، با بڵێین هەرێمی و نێودەوڵەتی، بە نمونە با بڵێین، کوردستان سەربازی ئێرانی لەخۆگرتووە، بە دڵنیاییەوە پارێزگاکانی دیکە ئەمە بە کێشە دەزانن، لەوانەیە ناڕەزایەتی و زیاتریشی لێبکەوێتەوە، سەرەنجام پەرچەکرداری لێدەکوێتەوە، لە ناوخۆ و وڵاتانی دیکەشەوە، بە پێچەوانەشەوە هەر راستە، بۆیە بوونی هەر سەربازێکی بیانی لە عێراق، دەبێتە هۆکاری نا سەقامگیری و رێگری لە گەشەپێدان و بونیادنان دەکات، ئەمە راستییە، هەندێک کەس و لایەن، دەیانەوێت ئەمە بۆ مەبەستێکی دیکە بقۆزنەوە، سەرنج دەخەنە سەر بەشێکی بابەتەکە، دەڵێن بوونی ئێران کێشەیە، بەڵام بوونی ئەمه‌ریکا کێشە نییە، یان بە پێچەوانەوە، یان دەڵێن تورک قەیناکا، بەڵام ئەویدیکە نا، ئەگەر دەتانەوێت عێراق سەقامگیر بێت، نابێت هیچ سەربازێکی بیانی لەناو عێراق هەبێت، سوپای عێراق چییەتی، هێزەکانی پێشمەرگە لە باکوور هەن، حەشدی شەعبی و وەزارەتی بەرگریمان هەیە و گەنج و سەربازی ئازامان هەیە و هەروەها وەزارەتی ناوخۆش، سبەی ئەگەر تووشی شەڕێک بین، لەوانەیە بتوانین ملیۆنان گەنج ئامادە بکەین بۆ بەرگری لە وڵاتەکەمان، پێوستیمان بە کەس نییە، ئەمە خاڵی دووەم بوو، سێیەم، دیسان دەگەڕێمەوە و دەڵێم ئێمە لە پەرلەمان بووین، ئایا دەنگدان لەسەر یاسایەک ئەگەر جێی مشتومڕیش بێت، بەڵام زۆرینەی هێنا یاسایە یان نا؟ یاسایە، ئێستا لە رووی دەستوور و یاساوە، ئەگەر 170 یان 180 زیاتری ئەندامان، جا لە یەک پێکهاتە بن یان تێکەڵاو، دەنگییان بە یاسایەک دا، ئەوا پێویستە لایەنەکانی دیکە پابەندی بن، هەر چەند دژیشی بێت، بەڵام دەبێت پابەندبێت، بۆیە بە رای من، دەبێت سەرجەم هێزە بیانییەکان بچنە دەرەوە، تا عێراق سەقامگیر بێت.

بەڕێز عەبدولحوسەین عەبتان، وەزیری پێشووتر و سەرۆکی فراکسیۆنی ئیقتیدار وەتەن، زۆر سوپاس بۆ ئەم دەرفەتە و سازدانی ئەم چاوپێکەوتنە، هیوای سەرکەوتنت بۆ دەخوازین.

عەبدولحوسەین عەبتان: سوپاس بۆ ئێوە.