یاریزانێکی کورد پاڵەوانیەتییەكی نێودەوڵەتی بەدەستهێنا
K24 - هەولێر
یاریزانێکی كورد بەشداری لە پاڵەوانییەتیێکی نێودەوڵەتی دەکات و توانی پلەی یەكەم بە دەستبێنێت.
دیار كاردۆ سۆرانی، یاریزانێكی لەشجوانی كوردە و دانیشتووی وڵاتی نەمسایە و لە پاڵەوانیەتی نێودەوڵەتیدا( Ifbb Austria national and Internat ) پلەی یەكەمینی بەدەستهێنا.
دیار کاردۆ، بە کوردستان24ی گوت: "خۆشحاڵم كە توانییم وەكو یاریزانێكی لەشجوانی لە بەشەكەی خۆم كە بریتی بوو Classic Bodybuilding Junior و Classic Physiq Junior پلەی یەكەم لە پاڵەوانییەتی نێودەڵەتی بەدەست بهێنم".
گوتیشی: "پێشتر لە هەرێمی كوردستان و لە شاری هەولێر راهێنانم لە یاری لەشجوانی كردووە، دواتریش لە وڵاتی نەمسا بەردەوام بووم و زیاتر گرنگیم پێدا، ئەمەش وایکرد بتوانم بەشێك لە خەونەكانی ژیانم بهێنمە دی، نازناوێك هەم بۆ وڵاتی نەمسا هەمیش بۆ هەرێمی كوردستان بەدەست بهێنم".
ئەو یاریزانە کوردە، سوپاسی خانەوادەكەی دەكات و دەڵێ: "زۆر پشتگیریان كردووم تا گەیشتم بەو ئاستە و نازناوەكە بەدەست بهێنم".
دیار کاردۆ، خەڵکی گوندی دەرگەڵەی سەر بە قەزای رواندزە و لەگەڵ خێزانەکەی لە وڵاتی نەمسا دەژیت. ئەو لە نەمسا لە دایکبووە، بەڵام چەند ساڵێک لەمەوبەر لەگەڵ ئەندامانی خێزانەکەی گەڕاوەتەوە هەرێمی کوردستان و لە هەولێر نیشتەجێبوونە و دەستی بە یاری لەشجوانی کردووە، بەڵام دواتر جارێکی دیکە گەڕاوەتەوە نەمسا و لەو بەردەوام بووە لە یاری کردن.