هەشت كاندیدی دەستەی کارگێڕی یانەی هەولێر: دەمانەوێت چاکسازی لەناو یانەی هەولێر بکرێت
هەشت كاندیدی دەستەی کارگێڕی یانەی هەولێر لە کۆنگرەیەکی رۆژنامەڤانیدا پلان و بەرنامەی خۆیان بۆ بەڕێوەبردنی یانەی هەولێر راگەیاند و داوایان کرد 'چیدیکە لەوە زیاتر هەڵبژاردنی دەستەی کارگێڕی یانەی هەولێر دوانەخرێت'.
هەریەکە لە تەها قادر، وەلید عارەب، ئەحمەد شکور، ئیبراهیم قادر، ئاڵا دێدەوان، مۆفەق یونس، دیدار حامید و سەردار فارس کە خۆیان بۆ هەڵبژاردنەکانی یانەکە پاڵاوتووە، لە پرێس کۆنفرانسێکدا پلان و بەرنامەی خۆیان بۆ بەڕێوەبردنی یانەی هەولێر راگەیاند و دووپاتیانکردەوە 'ئێمە وەکو کۆمەڵێک گەنجێکی خاوەن بڕوانامە و ئەزموون دەمانەوێت تەریب لەگەڵ بەرنامە و پلانی چاکسازی سەرۆکی حکومەتی هەرێمی کوردستان گۆڕانکاریی لە یانەی هەولێر بکەین و داوا دەکەین حکومەت هاوکار و پاڵپشتمان بێت و هەڵبژاردنی دەستەی کارگێڕی یانەی هەولێر لە وادەی دیاریکراوی خۆی دوانەخرێت'.
وابڕیارە رۆژی چوارشەممە هەڵبژاردنی دەستەی کارگێڕی یانەی هەولێر بکرێت کە 25 بەربژێر خۆیان بۆ هەڵبژاردنەکانی یانەکە بەربژێر کردووە و نۆ کەس بۆ ئەندامی دەستەی کارگیڕی یانەکە دەردەچن.
بەرنامەی هەشت كاندیدهكه بۆ بەڕێوەبردنی یانەی هەولێر:
یەکەم: گەڕانەوە و ئاشتکردنەوەی هاندەرانی یانەی هەولێر بۆ ناو یاریگا لە رێگای گرنگیدان و هێنانە پێشەوەی ئەستێرەکانی یانەکە و پێشکەشکردنی خزمەتگوازاری شایستەی بە هاندەران لەکاتی ئامادەبوون و سەردانیکردنی یاریگا و یانەکە. پێکهێنانی دەستەی هاندەران بەشێوازێکی نوێ و سەردەمیانە.
دووەم: رەخساندنی هەلی کار بۆ راهێنەران و وەرزشوانە لاوەکان لە رێگای پێکهێنانی لێژنەی هونەری بۆ پێشخستن و رەخساندنی هەلی کار، دامەزراندنی وەرزشوانانی لاو و کارمەندان لە رێگای پێشکەشکردنی سیڤی و چاوپێکەوتن.
سێیەم: کارکردن لەسەر زیادکردنی داهاتی یانە، بەشێوەیەک یانەی هەولێر نەبێتە بارگرانی لەسەر حکومەتی هەرێمی کوردستان، بەڵکو بتوانێت لە داهاتوو باج بە حکومەت بدات.
چوارەم: دانانی ستراتیژیەتێکی تایبەت بۆ دروستکردن و پێکهێنانی گشت تیپەکان لە رێگای دەستنیشانکردنی سەرپەرشتیاری هونەری بەتوانا بۆ گشت تیپەکان و گشت تەمەنەکان. دابینکردنی بودجە بۆ هەموو تیپ و یارییەکان لە سەرەتای وەرزەوە.
پێنجەم: دووبارە بونیادنانەوەی ژێرخانی یانەکە لە رێگای دروستکردنی مەلەوانگە و هۆڵی داخراو و نەخۆشخانە و هۆڵی یارییە تاکەکان.
شەشەم: ئەنجامدانی پرۆتۆکۆڵی وەرزشی لەگەڵ یانە پێشکەوتووەکانی وڵاتانی دیکە.
حەوتەم: دانانی پەیڕەوێکی ناوخۆیی نوێ و سەردەمیانە بۆ یانەی هەولێر کە بگونجێت لەگەڵ گەورەیی و ناوی یانەکە.