وەزارەتی پێشمەرگە ئەو لیوایە ئاشكرا دەكات كه له‌گه‌ڵ لیوا هاوبه‌شه‌كان تێكه‌ڵ ده‌كرێت
K24- هه‌ولێر:
وەزارەتی پێشمەرگە رایدەگەیاند، لیوای 20ی وەزارەتی پێشمەرگە لەگەڵ لیوایەكی دیكەی سوپای عێراق تێكەڵ دەكرێت، بۆ ئەوەی دوو لیوا ھاوبەشیان لێدروستبكرێت بۆ كۆنترۆڵكردنی ناوچە كوردستانیەكانی ده‌ره‌وه‌ی ئیداره‌ی هه‌رێم و لە سنووری موسڵ، كەركووك، مەخموور و خانەقین جێگیردەكرێن، بۆ ئه‌و مه‌به‌سته‌ش به‌م نزیكانه وەزارەتی پێشمەرگە و سوپای عێراق كۆدەبنەوە.
لە نوسراوێكدا كە واژۆی مستەفا كازمی، سەرۆك وەزیرانی عێراقی به‌سه‌ره‌وه‌یه، رەزامەندی لەسەر گواستنەوەی لیوای 20ی وەزارەتی پێشمەرگە بۆ سەر وەزارەتی بەرگری عێراق دراوه .
قارەمان شێخ كەمال، جێگری سوپاسالاری پێشمەرگە بۆ ئۆپەراسیۆن بە كوردستان2ی راگه‌یاند، لە چوارچێوەی رێككەوتنی وەزارەتی پێشمەرگە و سوپای عێراق بۆ دروستكردنی دوو لیوای ھاوبەش، وەزارەتی پێشمەرگە لیوای 20ی بۆ ئەو مەبەستە دیاری كردووە، بۆ ئەوەی ئەم دوو لیوا ھاوبەشە پێكبھێنرێن و دەبێت بچنە سەر وەزارەتی بەرگری عێراق، دواتر لەگەڵ لیوایەكی دیكەی وەزارەتی بەرگری دوو لیوای ھاوبەشیان لێدروست دەكرێن و لە سنووری كەركووك، دەشتی مووسڵ، مەخموور و خانەقین جێگیردەكرێن.
گوتیشی: بۆ رێككەوتن لەسەر چۆنیەتی ئەرك و مووچە و دابەشكردنی ھەیكەلیەتیان، بەم نزیكانە وەزارەتی پێشمەرگە و سوپای عێراق كۆدەبنەوە و دەگەنە رێككەوتنی كۆتای.
ساڵی رابردوو ھەرودوو وەزارەتی پێشمەرگە و سوپای عێراق لەسەر پێكھێنانی چەند ژوورێكی ھاوبەش رێككەوتن، ئەز رێككەوتنەش چووە بواری جێبەجێكردن، ئێستاش لە قۆناغی گفتوگۆدان بۆ پێكھێنانی دوو لیوای ھاوبەش، بەپێ رێككەوتنەكە فەرماندە و جێگری ھەر لیوایەك لە نێوان وەزارەتی پێشمەرگە و سوپای عێراق دابەشكراوە، ھەر لیوایەك فەرماندەكەی عەرەب بێت ئەوا جێگرەكەی كورد دەبێت، ئەگەر فەرماندەكە كور دبێت جێگرەكەی عەرەب دەبێت.
H.B