فێستیڤاڵی شانۆی سەرشەقام لە سۆران - رواندز دەستپێدەکات

هەشت گرووپی شانۆیی بەشداری لە فێستیڤاڵەکەدا دەکەن
دیمەنێکی فێستیڤاڵەکە
دیمەنێکی فێستیڤاڵەکە

K24 - سۆران

ئەمڕۆ پێنجشەممە 28/10/2021، بە ئامادەبوونی ژمارەیەك لە بەرپرسانی حكومی و حزبی و ھونەرمەند و ھونەردۆستان، لەژێر چاودێری ھەڵگورد شێخ نەجیب سەرپەرشتیاری ئیدارەی سۆران، فێستیڤاڵی شانۆی سەرشەقام لە سۆران - رواندز لەژێر ناوی (گەڕانەوەی ژیان بۆ مرۆڤایەتی) دەستپیپێکرد.

ئەو فێستیڤاڵە بە بەشداری ھەشت گرووپی شانۆیی لە شارەكانی كوردستان بەڕێوەدەچێت و شانۆگەرییەكان لەسەرشەقام و ناوچە جیاوازەكانی سۆران و رواندز نمایش دەكرێن.

یوسف عومەر، بەڕێوەبەری رۆشنبیری و هونەری سۆران بە کوردستان24ی راگەیاند: "چەند ساڵێکە بەهۆی قەیرانی دارایی و ڤایرۆسی کۆرۆنا، چالاکیی گەورەی هونەری لەم سنوورە ئەنجامنەدراون، بۆیە ئەم چالاکییە گرنگی خۆی دەبێت".

گوتیشی: "دەستپێکی فێستیڤاڵ لەناو هۆڵە، بەڵام شانۆگەرییەکان لەسەر شەقام و شوێنە گشتییەکان نمایش دەکرێن".

لە دەستپێکی رۆژی یەكەمی فێستیڤاڵ چەند وتارێك لەلایەن سەرپەرشتیار و لیژنەی ئامادەكاری فێستیڤاڵ پێشكەش دەكرێن. دواتر گەشتێكی گۆرانی و موزیك لەلایەن مامۆستا و قوتابیانی پەیمانگای ھونەرەجوانەكانی رواندز پێشكەش دەكرێ. ھەروەها گرووپی سەمای لەیزین-ی سلێمانی نمایشێك دەكەن.

ھەر لە رۆژی یەكەمی فێستیڤاڵی سەرشەقام چەند شانۆگەریەك لەلایەن گرووپەكانی پیرەمەگرون - سلێمانی، گرووپی شانۆ بۆ شانۆی سەرشەقام-كۆیە، گرووپی شانۆی ئایندەی كەركووك نمایش دەكرێن.

فێستیڤاڵی شانۆی سەرشەقام ماوەی سێ رۆژ بەردەوام دەبێت و رۆژانە لەسەرشەقام و شوێنە گشتییەكانی ھەردوو قەزای رواندز و سۆران، چەند شنۆگەریەك نمایش دەكرێن.

ھەر لە چوارچێوەری بەڕێوەچوونی فێستیڤاڵ، چەند سیمینار و پانێلێك لەبارەی شانۆ بەگشتی و شانۆی سەرشەقام بەتایبەتی بەڕێوەدەچێت.

گرووپە بەشداربووەكانی فێستیڤاڵ بریتین لە: تیپی شانۆی پیرەمەگرون-سلێمانی، گرووپی شانۆ بۆ شانۆی سەرشەقام – كۆیە، گرووپی شانۆی ئایندەی كەركووك، گرووپی شانۆی دەربەندیخان، گرووپی شانۆی شۆڕشڤان-دھۆك، گرووپی شانۆی ھەولێر، گرووپی سەمای لەیزین-سلێمانی، گرووپی شانۆی دیالۆگ-كەركووك.

نمایشی سەمای بالێ لە دەستپێکی فێستیڤاڵ
نمایشی سەمای بالێ لە دەستپێکی فێستیڤاڵ
نمایشی سەمای بالێ لە دەستپێکی فێستیڤاڵ
نمایشی سەمای بالێ لە دەستپێکی فێستیڤاڵ
نمایشی سەمای بالێ لە دەستپێکی فێستیڤاڵ
نمایشی سەمای بالێ لە دەستپێکی فێستیڤاڵ
دیمەنێکی رێوڕەسمی دەستپێکردنی فێستیڤاڵ
دیمەنێکی رێوڕەسمی دەستپێکردنی فێستیڤاڵ