سەرۆکی حکومەتی هەرێمی کوردستان پێشوازی لە گەورە راوێژکاری سەربازی حکومەتی بەریتانیا دەکات
K24 - ههولێر:
مەسرور بارزانی سەرۆکی حکومەتی هەرێمی کوردستان، ئەمڕۆ دووشەممە 8ی نۆڤێمبەری 2021 پێشوازی لە مارشاڵ سامی سیمپسن گەورە راوێژکاری سەربازی حکومەتی بەریتانیا بۆ کاروباری رۆژهەڵاتی ناوەڕاست و باکووری ئەفریقیا کرد.
لە دیدارەکەدا، کە دەیڤد هەنت، کونسوڵی گشتیی بەریتانیا لە هەرێمی کوردستان ئامادەی بوو، بارودۆخی گشتیی عێراق دوای هەڵبژاردنی ئەنجومەنی نوێنەران و پەیوەندی دوولایەنە تاووتوێ کرا.
هەردوولا هێرشە تیرۆریستییەکەی سەر شوێنی نیشتەجێبوونی سەرۆک وەزیرانی فیدراڵیان بە توندی سەرکۆنە کرد و پشتگیریی خۆیان بۆ پاراستنی سەقامگیریی دۆخی عێراق و ئەزموونی دیموکراسیی دووپات کردەوە.
گەورە راوێژکاری سەربازی حکومەتی بەریتانیا، ئاماژەی بە پێگەی گرنگیی هەرێمی کوردستان وەک فاکتەرێکی سەقامگیریی لە ناوچەکە کرد و پابەندبوونی وڵاتەکەشی بۆ بەردەوامبوونی پشتیوانیکردنی هەرێمی کوردستان و بەتایبەتی پێشمەرگە لە رووبەڕووبوونەوەی تیرۆر دەربڕی.
سەرۆکی حکومەت، سوپاسی پشتگیریی بەردەوامیی بەریتانیا و هێزەکانی هاوپەیمانانی کرد و جەختی لە گرنگیی پاراستنی سەقامگیریی و پێشخستنی پرۆسەی سیاسیی عێراق، لە رێگەی پێکهێنانی حکومەتێکی گشتگیر کردەوە، کە خزمەتی سەرجەم پێکهاتە جیاوازەکانی عێراق بکات.