كاروانێكی 176 كۆچبه‌ری له‌ مینسكه‌وه‌ گه‌یشته‌وه‌ هه‌ولێر

"به‌چاوی خۆی كۆچبه‌ری بینیوه‌ كه‌ گه‌یشتووه‌ته‌ فڕۆكه‌خانه‌ی هه‌ولێر له‌ هه‌رێمی كوردستان كڕنۆشی بردووه‌، چونكه‌ ئه‌وه‌نده‌ ئازار و ناڕه‌حه‌تی بینیوه‌"
یه‌كێك له‌و كۆچبه‌رانه‌ی له‌ بێلاڕووسه‌وه‌ گه‌ڕاوه‌ته‌وه‌
یه‌كێك له‌و كۆچبه‌رانه‌ی له‌ بێلاڕووسه‌وه‌ گه‌ڕاوه‌ته‌وه‌

K24 - هه‌ولێر:

كاروانێكی دیكه‌ی كۆچبه‌ران له‌ رێگه‌ی فڕۆكه‌خانه‌وه‌ له‌ میسنكی پایته‌ختی بێلاڕووس گه‌یشته‌وه‌ هه‌ولێری پایته‌ختی هه‌رێمی كوردستان.

په‌یامنێری كوردستان24 رایگه‌یاند، ئه‌و فڕۆكه‌یه‌ گه‌یشتووه‌ته‌ فڕۆكه‌خانه‌ی نێوده‌وڵه‌تی هه‌ولێر، 176 كۆچبه‌ری تێدابووه‌ و له‌ رێگه‌ی ئاسانكارییه‌كانی حكومه‌تی هه‌رێمی كوردستان و عێراقه‌وه‌ گه‌شته‌كه‌ رێكخراوه‌.

كۆچبه‌رێك كه‌ خه‌ڵكی رانیه‌یه‌ وێڕای ده‌ربڕینی سوپاسگوزاری بۆ حكومه‌تی هه‌رێمی كوردستان، راشیگه‌یاند، ئه‌وه‌ی ده‌گوترێن له‌ باره‌ی یه‌كسانی و مافی مرۆڤ هه‌مووی درۆیه‌ و كۆچبه‌ران زۆر ئه‌شكه‌نجه‌ ده‌درێن.

هه‌روه‌ها گوتی: "به‌چاوی خۆی كۆچبه‌ری بینیوه‌ كه‌ گه‌یشتووه‌ته‌ فڕۆكه‌خانه‌ی هه‌ولێر له‌ هه‌رێمی كوردستان كڕنۆشی بردووه‌، چونكه‌ ئه‌وه‌نده‌ ئازار و ناڕه‌حه‌تی بینیوه‌".

داواشی له‌ حكومه‌تی هه‌رێمی كوردستان كرد كه‌ هاوكاری گه‌ڕانه‌وه‌ی ئه‌و كۆچبه‌رانه‌ بكات و گوتی: "رێگه‌ناده‌ن كۆچبه‌ران له‌سه‌ر سنووری نێوان بێلاڕووس و پۆڵه‌ندا بگه‌ڕێنه‌وه‌ مینسكی پایته‌ختی بێلاڕووس".

دووپاتی له‌وه‌شكرده‌وه‌، كه‌شه‌كه‌ی ئه‌وێ زۆر سارده‌ و پۆلیس بێلاڕووس ئه‌شكه‌نجه‌ی كۆچبه‌ران ده‌ده‌ن.

یه‌كێكی دیكه‌ له‌و كۆچبه‌رانه‌ی گه‌ڕاوه‌ته‌وه‌، بۆ كوردستان24 گوتی: "هیوادارم كه‌س نه‌كه‌وێته‌ داوی درۆی قاچاخچییه‌كان و باوه‌ڕیان پێنه‌كه‌ن".