پسپۆرێكی به‌ریتانی: جیا له كۆرۆنا په‌تای دیكه‌ی كووشنده به‌ڕێوه‌ن
K24 – هه‌ولێر:
یه‌كێك له‌و پسپۆرانه‌ی كه به‌شداریكردووه له دۆزینه‌وه‌ی ڤاكسینی ئسترازینكا له زانكۆی ئۆكسفۆردی به‌ریتانی رایده‌گه‌یه‌نێت، له داهاتوودا په‌تای ڤایرۆسی دیكه له جیهان بڵاو ده‌بنه‌وه، كه له كۆرۆنا مه‌ترسیدارتر و كووشنده‌ترن.
ساره گاڵبێرت، یه‌كێك له‌و پسپۆرانه‌ی كه به‌شداربووه له دۆزینه‌وه‌ی ڤاكسینی ئسترازینكای به‌ریتانی رایگه‌یاند، ڤایرۆسی كۆرۆنا دوا په‌تای جیهانی نابێت، ئه‌و په‌تایانه‌ی كه له داهاتوودا بڵاو ده‌بنه‌وه خێراتر و كووشنده‌تر ده‌بن.
ئه‌و پسپۆره راشیگه‌یاند، به‌هۆی بڵاوبوونه‌وه‌ی په‌تای دیكه‌ی ڤایرۆسی، رێژه‌ی مردن و تووشبوون له جیهاندا به به‌راورد له‌گه‌ڵ په‌تای كۆرۆنا، زۆر به‌رزتر ده‌بنه‌وه.
جه‌ختیكرده‌وه، داوا له هه‌موو وڵاتانی جیهان ده‌كه‌م ئاماده‌كاری بۆ بڵاوبوونه‌وه‌ی ئه‌م په‌تایانه بكه‌ن، سوود له رێككاره‌كان و زانیارییه‌كانی په‌تای كۆرۆنا وه‌ربگرن.