نرخی نەوت بە رێژەیەکی بەرچاو دابەزی

K24 - هەولێر

نرخی نەوت لە مامەڵەکانی ئەمڕۆ دووشەممەدا زیاتر لە %3ـی نرخەکەی لەدەستدا، هۆکاری ئەو داکەوتنە بەرچاوەش بەرزبوونەوەی ژمارەی تووشبوونە بە کۆرۆنای جۆری ئۆمیکرۆن لە ئەوروپا و ئەمەریکا، بەهۆیەوە مامەڵەکاران ترسیان هەیە جارێکی دیکە رێوشوێنەکانی خۆپارێزی زیان بە خواست بۆ سووتەمەنی بگەیەنێت.

لەسەر ئاستی مامەڵەکاندا نرخی بەرمیلێک نەوتی خاوی برێنت لە گرێبەستەکانی داهاتووی بە رێژەی 3.22% بۆ 71.14 دۆلار دابەزی.

هەروەها نرخی بەرمیلێک نەوتی سووکی رۆژئاوای تێکساس بە رێژەی 3.87% بۆ 68.11 دۆلار دابەزی.

ئەمە لە کاتێکدایە، دوێنێ یەکشەممە هۆڵەندا کەرەنتینی راگەیاند، پێشبینی دەکرێت بەهۆی کۆرۆناوە رێوشوێنی خۆپارێزی و کەرەنتین لە چەندین وڵاتی دیکە بەر لە پشووکانی سەری ساڵ رابگەیەنێت.