وەزارەتێک وەرگرتنی ڤاکسین بۆ فەرمانبەر و هاووڵاتییان دەکاتە مەرج
K24 – هەولێر
وەزارەتی داد رایگەیاند، سەرەتای ساڵی داهاتوو دوا مۆڵەتە بۆ فەرمانبەرانی وەزارەتەکەیان هەر کەسێک ڤاکسین وەرنەگرێت ناتوانێت پابەندی دەوام بێت، هاوکات هەر هاووڵاتییەکیش ڤاکسینی وەرنەگرتبێ نابێ سەردانی وەزارەتی داد و فەرمانگەکانی سەر بەو وەزارەتە بکات.
بەگوێرەی گشتاندنێک کە واژۆی وەزیری دادی حکومەتی هەرێمی کوردستان فەرسەت ئەحمەد- ی لەسەرە لە سەرەتای ساڵی داهاتووەوە فەرمانبەرانی وەزارەتی داد و فەرمانگەکانی ئەو وەزارەتە بەبێ وەرگرتنی ڤاکسین رێگەیان پێنادرێت دەوام بکەم، ئەو هاووڵاتییانەی ڤاکسینیشیان وەرنەگرتووە ناتوانن سەردانی وەزارەتی داد و فەرمانگەکانی ئەو وەزارەتە بکەن.
لە گشتاندنی وەزارەتی داد ئەم سێ خاڵە خراونەتەڕوو:.
یەکەم: هەر فەرمانبەرێک لەهەر پلەو پۆستێک بێت ئەگەرتا 1/1/2022 ڤاکسینی وەرنەگرتبێت، ناتوانێت پابەندبێت بەدەوامی فەرمی.
دووەم: لەدوای 1/1/2022ـەوە هیچ هاووڵاتییەک ناتوانێت سەردانی فەرمانگەکان بکات بە مەبەستی رایکردنی مامەڵەکانیان بەبێ وەرگرتنی ڤاکسین.
سێیەم: لە کاتی جێبەجێ نەکردنی ئەم گشتاندنە، سەرۆک و بەرپرسی فەرمانگە روبەرووی لێپێچینەوە دەبن.