دەرگای خۆکاندیدکردنى بۆ پۆستى سەرۆک کۆمار کرایەوە
K24 – هەولێر
دوای هەڵبژاردنی دەستەی سەرۆکایەتی ئەنجومەنی نوێنەران، دەرگای خۆکاندیدکردنى بۆ پۆستى سەرۆک کۆمار کرایەوە.
محەمەد حەلبوسى سەرۆکى ئەنجومەنی نوێنەرانی عێراق، دەرگای خۆکاندیدکردنى بۆ پۆستى سەرۆک کۆمار کردەوە و لەماوەى 15 رۆژدا، سەرۆکێکی نوێ بۆ عێراق هەڵدەبژێردرێت.
دوێنێ 9/1/2022، محەمەد حەلبووسى بە سەرۆکی پەرلەمانی عێراق هەڵبژێردرایەوە و هەریەک لە شاخەوان عەبدوڵڵا و حاکم زاملی، وەک جێگرانی سەرۆک هەڵبژێردران، بەڵام چوارچێوەى هەماهەنگى شیعە، رەتیکردەوە دان بە ئەنجامى هەڵبژاردنى دەستەی سەرۆکایەتى پەرلەماندا بنێت.
هەردوێنێ، فراکسیۆنی سەدر، لە پەرلەمانى عێراق ناو و واژۆى ئەندامانى گەورەترین کوتلەی، رادەستى سەرۆکى پەرلەمان کرد.