ئه‌و بانده‌ی به ناوی هه‌لی كار 8 ئۆتۆمبێلیان دزیبوو، ده‌ستگیركران
K24 - هه‌ولێر:
به‌ڕێوه‌به‌رایه‌تی ئاسایشی هه‌ولێر له راگه‌یه‌ندراوێكدا ئاشكرای كرد، ئه‌و بانده‌یان ده‌ستگیركردووه، كه له دوو رۆژی رابردوودا به‌ناوی هه‌لی كار 8 ئۆتۆمبێلی گرانبه‌های هاووڵاتیانیان دزیبوو.
له راگه‌یه‌ندراوه‌كه‌ی به‌ڕێوه‌به‌رایه‌تی ئاسایشی هه‌ولێردا هاتووه: باندێكی دزیكردن به‌ناوی هه‌لی كار فێڵیان له ژماره‌یه‌ك هاووڵاتی كردووه و ئۆتۆمبێله‌كانیان دزیون، دوای به‌دواداچوونی به‌ڕێوه‌به‌رایه‌تییه‌كه‌مان، به هاوكاری پۆلیسی هه‌ولێر ئه‌مشه‌و ئه‌و بانده ده‌ستگیركران.
ئاماژه به‌وه‌ش كراوه، بانده‌كه لێكۆڵینه‌وه‌یان له‌گه‌ڵ ده‌كرێت و دوای ئه‌وه‌ش ده‌درێنه دادگا و سزای یاسایی خۆیان وه‌رده‌گرن.
دوای ئه‌وه‌ی ئه‌مڕۆ له راپۆرتێكدا كوردستان24 به‌دواداچوونی بۆ دزینی ئه‌و 8 ئۆتۆمبێله‌كرد، كه كۆمپانیایه‌ك به ناوی هه‌لی كاره‌وه، فێڵی له ژماره‌یه‌ك هاووڵاتی كردووه، هێزه‌كانی ئاسایش و پۆلیسی هه‌ولێر به‌په‌له به‌ده‌نگ داواكاری ئه‌و هاووڵاتییانه هاتن و بانده‌كه ده‌ستگیركران.
