سەدر لەسەر بڕیارەکەی دادگای فیدراڵی پەیامێکی بڵاوکردەوە
K24 -هەولێر:
لە تویتێکدا لە هەژماری تایبەتی خۆی لە تۆڕی کۆمەڵایەتی تویتەر، موقتەدا سەدر، رێبەری رەوتی سەدر پەیامێکی لەسەر بڕیارەکەی دادگای فیدراڵی بڵاوکردوە و گوتی: جارێکی دیکە دەسەڵاتی دادوەری بێلایەنی خۆی سەلماند.
لە درێژەی پەیامەکەیدا، سەدر گوتی " دەسەڵاتی دادوەری نەکەوتە ژێر فشاری سیاسی، سوپاس بۆ خودا و سوپاس بۆ دادگای فیدراڵی عێراق، بەمجۆرە هەڵوێستانە نیشتیمان بنیات دەنرێت".
موقتەدا سەدر جەختی لەوە کردەوە کە هێشتا سوورن لەسەر پێکهێنانی حکومەتی زۆرینی نیشتیمانی و دەرگایان واڵایە بۆ ئەوانەی متمانەمان پێیان هەیە.
ئەمڕۆ 25ـی کانوونی دووەم/یەنایری 2022 دادگای فیدراڵی عێراق سکاڵاکانی هەردوو پەرلەمانتاران مەحمود مەشهەدانی و باسم خهشانی لەسەر کۆبوونەوەی پەرلەمان رەتکردنەوە و رایگەیاند "یەکەم کۆبوونەوەی ئەنجومەنی نوێنەران یاسایی و دەستوورییە".
H.H