كۆشكی سپی: راوێژكاری ئهڵمانیا سهردانی واشنتن دهكات
K24- ههولێر:
کۆشکی سپی بڵاویكردهوه، ئۆلاف شۆڵتز، راوێژکاری ئەڵمانیا لە 7 ی مانگی داهاتوو (شوبات / فێبرایهر) سەردانی ئەمەریکا دەکات و لەگەڵ جۆ بایدن، سەرۆکی ئەمەریکا لهبارهی گرژییەکانی نێوان رووسیا و ئۆکرانیا گفتوگۆ دهكهن.
جین ساکی، گوتهبێژی كۆشكی سپی رایگهیاند، راوێژکاری ئەڵمانیا و سەرۆکی ئەمەریکا تاوتوێی بەرپرسیارێتییە هاوبەشەکانیان سەبارەت بە هەوڵە دیپلۆماسییهكان لهبارهی دۆسییهی ئۆکرانیا دهكهن.
جین ساكی راشیگهیاند، سهرۆكی ئهمهریكا و راوێژكاری ئهڵمانیا تاوتوێی بەردەوامبوونی ههماههنگییهكانی نێوانیان دەکەن، بهتایبهت کۆتایی هێنان بە ڤایرۆسی کۆرۆنا و هەڕەشەکانی گۆڕانی کەشوهەوا و هاندانی بوژانەوەی ئابووری و ئاسایشی نێودەوڵەتی.
چوارشەممەی رابردوو 26ـی كانوونی دووهم / یهنایهری 2022 وەزارەتی دەرەوەی ئەمەریکا رایگهیاند، پڕۆژەی هێڵی بۆری گازی نۆرد ستریم 2ـی نێوان رووسیا و ئەڵمانیا بەرەوپێشەوە ناڕوات ئەگەر رووسیا ئۆکرانیا داگیربکات.
هەزاران سەربازی رووسیا لە نزیک سنورەکانی ئۆکرانیا جێگیرکراون و رەوشەکە رۆژ دوای رۆژ بەرەو ئاڵۆزی زیاتر دەچێت، ئەم گرژییانەی نێوان رووسیا و ئۆکرانیا، رێکخراوی ناتۆی نیگەران کردووە، هەربۆیە بەشێک لە ئەندامانی رێکخراوەکە هەوڵەکانیان چڕتر کردووتەوە بۆ پێدانی چەک بە ئۆکرانیا لە دژی رووسیا.
شارەزایانی پەیوەندییە نێودەوڵەتی و سەربازییەكان پێیان وایە، رووسیا دەست بەجەنگ ناکات، بەڵام لە ئەگەری دروست شەڕ گورزی کوشندەی دەبێت.