وه‌زاره‌تی پێشمه‌رگه و هاوپه‌یمانان له‌باره‌ی جموجۆڵه‌كانی داعش كۆبوونه‌وه
K24- هه‌ولێر:
بریکاری وەزارەتی پێشمەرگە له‌گه‌ڵ گه‌وره راوێژكارێكی هاوپەیمانان له‌باره‌ی جموجۆڵەکانی داعش لە سنووری ناوچە کوردستانییەکانی دەرەوەی ئیدارەی هەرێم و گرنگی ئۆپەراسیۆنە هاوبەشەکان، كۆبووه‌وه.
وه‌زاره‌تی پێشمه‌رگه‌ی حكومه‌تی هه‌ێمی كوردستان راگه‌یه‌ندراوێكی بڵاوكرده‌وه، تێیدا هاتووه، ئه‌مڕۆ 14ـی شوبات / فێبرایه‌ری 2022، سەربەست لەزگین، بریکاری وه‌زاره‌تی پێشمه‌رگه، له‌گه‌ڵ كۆڵۆنێڵ تاد برۆس، گه‌وره راوێژكاری هێزه‌كانی هاوپه‌یمانان له عێراق و شاندی یاوه‌ری كۆبووه‌وه.
وه‌زاره‌تی پێشمه‌رگه راشیگه‌یاند، له كۆبوونه‌وه‌كه‌ی بریكاری وه‌زاره‌تی پێشمه‌رگه و شاندی هاوپه‌یمانان، باس لە پرسی یەکخستنه‌وه‌ی هێزەکانی 70و80 بۆ ژێر چەتری وەزارەت کرا، تیشکیش خرایە سەر جموجۆڵەکانی داعش، بە تایبەتی لە سنووری ناوچە کوردستانیەکانی دەرەوەی ئیدارەی هەريم و گرنگی ئۆپەراسیۆنە هاوبەشەکان.
وه‌زاره‌تی پیشمه‌رگه جه‌ختی له‌وه كرده‌وه، هەر لەو دیدارەدا، کۆنترۆڵکردن و فەرماندەییکردن (القیادة والسیطرة)ـی هێزەکانی پێشمەرگە و هه‌نگاوه‌كانی پێكهێنانی دوو لیوای هاوبه‌شی نێوان سوپای عێراق و هێزەکانی پێشمه‌رگه، تەوەرێکی دیكه‌ی کۆبوونەوەکە بوو، هەردوولا کۆکبوون لەبارەی بەردەوامبوونی هاوکارییەکانی هاوپەیمانان بۆ هێزەکانی پێشمەرگە.
