هەردوو شاندی رووسیا و ئۆکرانیا بۆ دانووستان لە بێلارووس کۆبوونەوە

شەڕی نێوان رووسیا و ئۆکرانیا پێی نایە رۆژی پێنجەمەوە
هۆڵی کۆبوونەوەی هەردوو شاندی ئۆکرانیا و رووسیا لە بێلارووس، وێنە: AFP
هۆڵی کۆبوونەوەی هەردوو شاندی ئۆکرانیا و رووسیا لە بێلارووس، وێنە: AFP

K24 - هەولێر:

ئەمڕۆ 28ـی شوبات/فەبرایەری 2022 ئۆکرانیا رایگەیاند، شاندێکی وڵاتەکەیان گەیشتوونەتە سنووری بێلارووس، بە مەبەستی دانووستان و کۆتاییهێنان بەو داگیرکاریەی لە رۆژی پێنجشەممەی رابردووەوە دەستی پێکردووە.

نوسینگەی سەرۆکی ئۆکرانیا رایگەیاند، ئامانج لە گفتوگۆکان لەگەڵ رووسیادا، وەستاندنی بەپەلەی جەنگ و کشانەوەی هێزەکانی رووسیایە.

بە گوێرەی هەواڵێكی وێبسایتی "تاس"ـی رووسی، شاندەکەی رووسیا لە وەزیری بەرگری ئۆلێکسی ریزنیکۆڤ و راوێژکاری نوسینەگەی سەرۆکی رووسیا، میخائیل بۆدۆلاک و چەند کەسایەتیەکی دیکە پێکهاتووە.

پێش دەستپێکردنی دانووستانەکان، وەزارەتی دەرەوەی بێلارووس رایگەیاند، شوێنی گفتوگۆکانی نێوان رووسیا و ئۆکرانیا لە بێلارووس ئامادەیە و چاوەڕێی شاندی هەردوولان.

دانووستانەکان بەبێ هیچ مەرجێکی پێشوەختە بەڕێوەدەچن و رووسیا پێشتر ئاماژەی بەوەدابوو، لەکاتی دانووستان ئاگربەست راناگەیەنن و بەردەوام دەبن لە ئۆپەراسیۆنە سەربازیەکانیان.