پوتن: یه‌ك مه‌رجم هه‌یه‌

رووسیا ئاماده‌یه‌ بۆ دانووستان، به‌ڵام..
ماكرۆن و پوتن
ماكرۆن و پوتن

K24 – هه‌ولێر:

سه‌رۆكی رووسیا، ڤلادیمێر پوتن، له‌گه‌ڵ هاوتا فه‌ره‌نساییه‌كه‌ی، ئیمانوێڵ ماكرۆن، له‌ باره‌ی ره‌وشی ئۆكرانیاوه‌ به‌ ته‌له‌فۆن قسه‌ی كرد و رایگه‌یاند، رووسیا ئاماده‌یه‌ بۆ دانووستان، به‌ڵام یه‌ك مه‌رجمان هه‌یه‌.

كۆشكی سه‌رۆكایه‌تی رووسیا (كرملین)، بڵاویكرده‌وه‌، ئه‌مڕۆ ماكرۆن په‌یوه‌ندی به‌ پوتنه‌وه‌ كردووه‌ و نیگه‌رانی وڵاته‌كه‌ی له‌ باره‌ی به‌ سه‌لامه‌تی پاراستنی وێستگه‌ ناووكییه‌كانی ئۆكرانیا خستووه‌ته‌ڕوو، له‌ به‌رامبه‌ریشدا پوتن پێی وتووه‌: توندڕه‌وه‌كانی ئۆكرانیا له‌ نزیك وێستگه‌ ناووكییه‌كه‌ هه‌راسانیان كردبووین و كرده‌ی جاڕسكاریان ده‌كرد و ئه‌وه‌ ناچاری كردین، هێرش بكه‌ینه‌ سه‌ر وێستگه‌ی ناووكی زابۆروژی.

هه‌روه‌ها روونیكردووه‌ته‌وه‌، سوپای رووسیا به‌ مه‌به‌ستی پاراستنی وێستگه‌كه‌ بۆ ئه‌وه‌ی نه‌كه‌وێته‌ ده‌ست نازییه‌ نوێیه‌كان و تیرۆریستان، ده‌ستی به‌سه‌ر وێستگه‌ی ناووكی چێرنۆبڵدا گرتووه‌.

سه‌باره‌ت به‌ دانووستان و ئاگربه‌ستیش، له‌ وه‌ڵامی داواكاری سه‌رۆكی فه‌ره‌نسادا، پوتن رایگه‌یاندووه‌، رووسیا یه‌ك مه‌رجی هه‌یه‌ بۆ راگرتنی شه‌ڕ و دانووستان، ئه‌ویش ئه‌وه‌یه‌، ئۆكرانیا هه‌موو داواكارییه‌كانی رووسیا به‌ بێ هیچ مه‌رجێكی پێشوه‌خت قبووڵ بكات.

بۆ بینینی نوێترین ڤیدیۆی شه‌ڕی ئۆكرانیا جۆیینی كه‌ناڵی كوردستان24 له‌ تێلیگرام بكه‌