به‌ بۆمبێكی 500 كیلۆیی شارێكی ئۆكرانیا بۆردومان كرا

وه‌زیری ده‌ره‌وه‌ی ئۆكرانیا: زۆر بۆمبی هاوشێوه‌ی ئه‌وه‌ ته‌قیوه‌ته‌وه‌ و خه‌ڵك كراونه‌ته‌ ئامانج
بۆمبه‌ 500 كلیۆگرامه‌كه‌ی رووسیا كه‌ نه‌ته‌قیوه‌ته‌وه‌
بۆمبه‌ 500 كلیۆگرامه‌كه‌ی رووسیا كه‌ نه‌ته‌قیوه‌ته‌وه‌

K24 - هه‌ولێر:

دمیترۆ كولبیا، وه‌زیری ده‌ره‌وه‌ی ئۆكرانیا وێنه‌ی بۆمبێكی رووسیای له‌ هه‌ژماری فه‌رمی خۆی له‌ تۆڕی كۆمه‌ڵایه‌تی تویته‌ر بڵاوكردووه‌ته‌وه‌ و رایگه‌یاند، بۆمبه‌كه‌ 500 كلیۆگرامه‌ و به‌سه‌ر گه‌ڕه‌كێكدا كه‌وتووه‌ته‌ خواره‌وه‌، كه‌ زۆر ترسناكه‌.

كولبیا له‌ تویته‌ر نووسیویه‌تی: "ئه‌و بۆمبه‌ رووسیه‌ ترسناكه‌ كه‌ كێشه‌كه‌ی 500 كلیۆگرام ده‌بێت، به‌سه‌ر باڵه‌خانه‌یه‌كی نیشته‌جێبوون له‌ شاری چڕنیهیڤ خراوه‌ته‌وه‌ خواره‌وه‌ و نه‌ته‌قیوه‌ته‌وه‌".

ئاماژه‌ی به‌وه‌ش كرد، "زۆر بۆمبی هاوشێوه‌ی ئه‌وه‌ ته‌قیوه‌ته‌وه‌، كه‌ بووه‌ته‌ هۆی كوژرانی پیاو و ژن و منداڵانی بێگوناح"، گوتیشی: "داوا ده‌كه‌م پارێزگاری له‌ گه‌له‌كه‌مان بكرێت به‌رامبه‌ر هێرشه‌كانی رووسیا، یارمه‌تیمان بده‌ن و دژه‌فڕێن له‌ ئاسمانی ئۆكرانیا بسه‌پێنن، فڕۆكه‌ی جه‌نگیمان پێبده‌ن، شتێك بكه‌ن".

ماوه‌ی چه‌ندین رۆژه‌ شاری چڕنیهێڤ-ی باكووری ئۆكرانیا رووبه‌ڕووی بۆردومانكردنی سوپای رووسیا بووه‌ته‌وه‌، رۆژی پێنجشه‌ممه‌ی رابردووش له‌ بۆردومانێك بۆ سه‌ر گه‌ڕه‌كێكی ئه‌و شاره‌ 47 هاووڵاتی ئۆكرانی گیانیان له‌ده‌ستدا.

ڤیاچیسلاڤ چاوس، شاره‌داری چڕنیهێڤ ئاشكرای كرد، له‌ بۆردومانه‌كاندا دوو قوتابخانه‌ و چه‌ند باڵه‌خانه‌یه‌ك كراونه‌ته‌ ئامانج و زیانێكی زۆری درووست كردووه‌.

چڕنیهێڤ ده‌كه‌وێته‌ باكووری ئۆكرانیا و 140 كلیۆمه‌تر له‌ كیێڤی پایته‌خته‌وه‌ دووره‌، له‌ 25ی شوبات/ فێبرایه‌ره‌وه‌ چه‌ندین جار بۆردومان كراوه‌، 280 هه‌زار كه‌س له‌و شاره‌ ده‌ژین، كه‌ یه‌كێك له‌ شاره‌ دێرینه‌كانی ئۆكرانیایه‌.

چڕنیهێڤ له‌سه‌ر نه‌خشه‌ی ئۆكرانیا
چڕنیهێڤ له‌سه‌ر نه‌خشه‌ی ئۆكرانیا